Ayera den oranan di atardi Sindicato di Maestro SIMAR y docentenan di scol Paso Pa Futuro a haci su di tres accion den siman aki, nan a presenta dilanti parlamento pa entrega dos manifiesto pa presidente di parlamento Juan Ady Thijzen.

Nan a trece dilanti cu desde cu minister Lampe a sigura cu scol lo no muda mas den aña escolar aki nan no a haya ningun siguransa riba esaki y a wordo pidi un carta of un documento cu ta soporta su palabranan, ademas cu minister Lampe a nombra un management nobo pa scol Paso pa Futuro y nan no ta compronde e motibo ni ta acepta esey tampoco, pa via cu segun Josephine Albertus presidente di sindicato a señala cu e management aki a wordo poni door di mudamento di scol pero esey lo no tuma luga mas.

Mayornan y docentenan a presenta un carta pa presidente di parlamento Juan Ady Thijzen na unda den dje nan a splica e situacion cu nan ta pasando pa exigi mas respet, mas comunicacion y mas transparencia di loke nan ta pasando den enseñansa na e momentonan aki, den un carta cu docentenan di scol a entrega nan ta bisa e motibo di pakico e mudamento lo no trece un mehoracion pa muchanan special y di dos carta ta di mayornan na unda nan ta splica e mesun motibo y cu na scol aki nan yiunan ta wordo evalua di un manera un positivo, entre otro motibonan.

Di su banda, Thijzen a expresa cu su persona ta compronde nan preocupacion, loke nan a presenta ta forma parti di trabou di minister di Enseñansa, nan trabou como parlamento ta pa controla gobierno y nan lo tuma nota di esaki den un reunion publico cu minister di Enseñansa Armando Rudy Lampe.

Durante accion aki, parlamentario di partido RED Ricardo Croes a expresa algun palabranan pa medionan di comunicacion y pa e docentenan presente na unda el a sigura cu un tono un poco altera cu e accion aki tabata pa hunga un wega politico pa via cu nan ta tumando algo personal contra minister Lampe, den esaki el a manifesta cu “ minister ta bringa pa muchanan, e no ta bringa pa placa y esey ta e berdad”.

“Berguensa ta ora docentenan ta sigui riba Facebook cu ta rebaha mandatarionan y parlamentario, educador bo ta y esey ta un berguensa”, Croes a vocifera.

Despues cu dianan pasa a keda conoci e situacion cu Scol Paso pa Futuro tabatin tres luna pa muda di nan edificio pa via di un decision di minister di Enseñansa, Ciencia y Desaroyo Sostenibel Armando Rudy Lampe, tambe a comunidad a wordo informa cu despues di un reunion entre minister hunto cu Sindicato di maestro SIMAR , trahadonan di scol y mayornan, scol lo sigui keda den mesun edificio.

Di esaki, Minister Lampe a sigura pa medionan local cu esaki no ta trata di un capricho sino cu pais Aruba ta mara na tratadonan internacional di derecho humano y e siman aki a keda publica e resolucion di Nacionnan Uni, el a trece como por ehemplo e caso di un mucha special na Spaña cu a dura casi 10 aña y door di esey a bin un resolucion na unda ta wordo bisa cu si minister kier of no, e mester cumpli riba mucha special su educacion.

Den e caso aki, el a splica cu si un mucha ta caba scol primario na scol Paso pa Futuro e tin derecho pa bay pa enseñansa secundario, “e no por keda na un scol primario”.

Tambe, el a comenta cu loke scol Paso pa Futuro tabata haci ta algo fout, y cu ta pone e pais e ora ey den un problema internacional “scol aki no kier a cumpli y a mi mester interveni den esey”, minister a declara.

Di loke ta trata e consecuencia di e situacion aki pa mudansa segun minister a menciona ta cu nan ta premira cu e resolucion aki ta cu scolnan special ta bay bira mas chikito y esey tin di haber cu e hecho cu hopi mayor lo bay scoge pa nan yiu bay scol regular, “a mi como minister mi tin e otro responsabilidad di cuida e placa di pueblo y si mi tin un edificio grandi lo mi pone un scol grandi eynan, scol chikito ta bay pa edificio mas chikito”, el a sigura y esaki tin di haber di bay riba e medionan financiero cu tin, e otro lo ta mal gastamento di placa.

Te awor, e muchanan lo keda den edificio aki y despues nan lo evalua cuanto mucha tin y esey ta merece pa tin un edificio grandi, “nos ta espera di yega na un mutuo acuerdo” , minister Lampe a expresa.

Durante un sesion informativo cu Sindicato di Maestro SIMAR a ofrece diahuebs pasa den nan plataforma on line cu docentenan di scol Paso pa Futuro y Scol Practico pa Ofishi (SPO) eynan a wordo treci dilanti cu muchanan a haya e guia, tempo y espacio, tur condicionnan basico cu nan tabatin mester pa yega na un cierto nivel.

Asina mes, a bisa cu den pasado tabatin un maneho na unda ta regarda cu e ora cu e mucha no ta cla, tin cu bay un aña mas, esey kiermen cu no a yega na rekisitonan basico y tin cu warda un aña mas pa yega asina leu, un di e docentenan a expresa cu tin ocasion cu nan ta laga muchanan keda sinta den zesde klas pa motibo aki pero a bin un cambio riba esaki, tambe ta pa motibo cu tin alumnonan cu no tin edad special emocional cu nan tin realmente.