Josephine Albertus:“Aworaki ta momento atrobe pa e veld di enseñansa lanta pa gobierno y pueblo completo wak cu e veld di enseñansa ta fada di e situacion cu nos ta cana”.
Ayera tardi presidente di sindicato Simar, Sra. Josephine Albertus, a yama un rueda di prensa extraordinario caminda el a haci un yamada na e veld di enseñansa completo, miembro y no miembro, pa atende awe 4:30 di atardi na Smar na e reunion extraordinario unda cu lo dialoga ariba e recortenan di finansas den e veld di eneseñansa.
Durante e rueda di prensa Sra. Albertus a splica cu veld di enseñansa tin recorte desde aña pasa mei, y ex-minister di enseñansa mes a bisa den parlamento cu veld di enseñansa a entrega 25 miyon na Fase aña pasa. E aña aki enseñansa ta sigui entrega e procentahe di nan salario desde januari te cu december, cu tabata e pronostico y Sra. Albertus ta señala cu eynan enseñansa a entrega mas cu 25 miyon.
E siman aki Minister di Enseñansa, Sr. Endy Croes, a anuncia durante un rueda di prensa cu mester corta 11 miyon den e presupuesto di enseñansa, y esaki a causa disgusto den veld di enseñansa. “Ta yega un momento cu bo ta bisa ta basta y nos ta bisa cu aworaki nos tin cu sali, nos no tin cu warda mas pasobra nos mes sa den veld con el a bay cuater aña anterior, cu cada biaha nos ta sali cu preocupacion y nada no a wordo haci y door di esey nos ta bisa cu enseñansa a wordo masacra”, Sra. Albertus a bisa.
El a señala cu na varios ocacion a bisa cu lo bin mehoracion den e veld di enseñansa y aworaki e recortenan ta sigui y hasta ta pidi mas di e veld. Sra. Albertus a menciona cu Simar ta hayando yamadanan diariamente ariba e situacion den e veld di enseñansa. E ta enfatisa cu no tin maestro na e scolnan pa traha y e alumnonan no por ricibi e lesnan di calidad cu nan tin derecho ariba dje.
Pa locual ta trata e parti social tambe, el a indica, tin necesdiad pa atencion. El a splica cu ora cu un mucha tin retraso, no ta tur ora ta trata di algo cognitivo, tin biaha e tin di haber cu e situacion na cas social y prome cu covid caba e situacion social na Aruba tabata precario, pero aworaki den temporada di covid el a bira mas precario y el a señala cu den e mas ey, enbes di pone extra trahado social, ta kita trahado.
“Nos ta bisa cu e ta birando di mas y asina ki nos no por sigui. Nos no por bisa atrobe cu nos ta bay warda, nos tin cu sali awo y bisa cu esaki no por sigui asina aki. Pesey awe tardi 4:30 Simar tin un reunion extraordinario pa full e veld di enseñansa, miembro di Simar of no miembro, tur hende ta invita, tur hende ta bon bini pasobra nos tin cu sinta hunto aworaki y evalua pasobra e mucha merece enseñansa di calidad y abo como esun cu ta traha den veld di eneseñansa tambe merece e respet”, el a agrega.
Sra. Albertus ta constata tambe cu aworaki e motivacion di esunnan trahando den e veld di enseñansa no tey y un factor crucial pa enseñansa por sigui na un manra responsabel ta e motivacion di e maestro pasobra sin e motivacion di e maestro no por percura pa e alumno ta central y no por percura pa duna enseñansa di calidad.
Pa Simar, el a enfatisa, ta hopi importante pa tin respet pa e veld di enseñansa, pa e alumno por haya enseñansa di calidad cu e mester. “Aworaki ta momento atrobe pa e veld di enseñansa lanta, yega 4:30 na Simar pa gobierno y pueblo completo wak cu e veld di enseñansa ta fada di e situacion cu nos ta cana”.
