Presidente di sindicato di maestro SIMAR, Josephine Albertus a expresa su preocupacion cu e situacion cu a surgi cu e werksternan na servicio di SKOA.
Si e trahadonan aki ta bay den accion, esaki ta nifica cu tur scol di SKOA lo permanece sushi creando un ambiente no sano pa nan alumnonan y docentenan. “Ora bo ta na pia di trabou bo mester ta sigur cu bo dunado di trabao ta pensa riba bo bienestar, salud y seguridad,” el a declara.
Igualmente el a laga sa cu e werksternan ta den incertidumbre mesun cos cu e docentenan. Y loke e werksternan ta pidiendo no ta hopi, el a bisa. E ta haya cu despues di e incertidumbre aki ta yegando e momento cu SKOA ta bay bisa cu nan no por otro cu kita nan for di trabao. Albertus no ta haya cu e ta husto, ya cu nos tur merece enseñansa di calidad. E werksternan ta un parti clave den esaki, y mester duna nan e respet y bin cu solucion.
“Hasta SKOA a bisa si algo bay fout ban wak hunto con nos por solucion’e,” el a declara na e matutino aki. Pero e ta mira cu te ainda no a bin un solucion pa e werksternan. P’esey ayera nan como SIMAR tabata t’ey den nan accion pa sostene e trahadonan di limpiesa di SKOA, pasobra nan tambe ta forma parti di enseñansa.
Mientras cu siman pasa, SKOA a laga sa cu si no tin werksternan, no tin scol. Kiermen scol no ta habri y SIMAR ta di acuerdo tambe. Pasobra e docente ta responsabel pa su alumnonan.
“Ora un mayor baha su yiu na scol e mester ta sigur cu na scol su bienestar, salud y siguridad ta wordo tuma na serio,” Albertus a declara na Bon Dia Aruba.
Actualmente mirando e posicion di minister Lampe, presidente di SIMAR ta haya cu gobierno no ta tum’e na serio. Pasobra si nan tin e alumno central y educacion na pecho, nan lo por a busca un solucion, segun presidente di SIMAR.
Segun Albertus, e werksternan t’ey y nan tin un posicion clave, nan tin cu yuda pa scol keda limpi. Vooral den e situacion di Covid cu nos ta aden, caminda tin exigencianan di salubridad pa mantene e luganan limpi y tur cos limpi tambe.
