Directiva di Sindicato di maestro di Aruba (SIMAR) a tuma nota cu tin hopi remarke riba tanto parlamento, como riba SIMAR relaciona cu tratamento di ley di restructuracion salarial di maestronan. Nan ta enfatisa por medio di un comunicado cu nan ta bogando pa basta tempo caba pa trata e ley aki. Nan ta awor den espera di formacion di un gobierno y parlamento nobo anto ta urgi esaki pa trata e ley mas pronto cu ta posibel.

SIMAR a forma parti di e stuurgroep cu a traha pa basta aña riba un structura nobo di salario di maestronan, y otro actornan importante den enseñansa. E structura ta inclui descripcion di e diferente funcionnan y e forma con e empleado lo por crece den entrada durante su trayectorio profesional segun SIMAR. Na luna di mei e stuurgroep a culmina cu su trabou y entrega e documento en cuestion na minister di enseñansa, Michelle Hooyboer-Winklaar. Parlamento na su turno a trata e ley y lansa su preguntanan riba esaki. E preguntanan aki, cu tabata encera algun investigacion, a wordo contesta. Pues e unico paso cu tabata falta ta pa pasa e ley segun SIMAR ta indica.

“Despues di 20 aña manera SIMAR mes ta splica, e ley a wordo finalisa y manda parlamento. Lamentablemente tabata tin un intento pa trata e ley tres siman pasa, pero mi a compronde cu el a wordo cancela despues cu algun miembro di parlamento a vocifera nan malcontento. Pa motibo segun nan solamente parlamento nobo por trata ley nobo,” sra. Hooyboer-Winklaar ta bisa Bon Dia Aruba. E ta sigui bisa cu e no por bisa precisamente pakico a tarda 20 aña cu esaki pero loke e ta wak ta cu el a rekeri hopi trabao pa haci tur calculacion y preparacion pa e ley. “Pa sinta cu tur partner, y pa presupuesta esaki. Tur esey a tuma ami y mi team casi tres aña,” sra. Hooyboer-Winklaar ta bisa nos. E ley aki a keda presupuesta pa 2017 caba. Sra. Hooyboer-Winklaar ta comenta,”pues no ta cuestion di algo cu ta extra si no e ta gedekt caba.”

‘Parlamento no ta funciona’
SIMAR ta sigui expresa cu no ta den man di sindicato pa yama of exigi reunion di parlamento y sindicato no tin control riba su funcionamento. “Nos por a tuma nota cu desde eleccion parlamento di Aruba no ta funciona optimal mas. Basa riba e hecho aki, SIMAR ta di opinion cu no ta responsabel pa trata e ley ya cu ta trata di un ley cu tin peso financiero y ta di suma importancia pa e posicion huridico di e empleadonan en cuestion,” SIMAR ta bisa den nan comunicado. SIMAR ta informa di a haci tur intento posibel pa e ley por a ser trata mas pronto cu ta posibel. A busca contacto cu presidente di e stuurgroep na diferente ocasion pa informacion di e desaroyonan. Esaki sin exito.

Tambe directiva a pidi reunion cu presidente di Parlamento, Mervin Wyatt-Ras pa haya informacion di e motibo pa no trata e ley y pa mustr’e e importancia pa haci esaki mas pronto cu ta posibel. Esaki sin a ricibi ningun reaccion. Directiva a tuma nota riba medionan social cu ainda tin hopi maestro cu no ta na altura di e desaroyonan di e ley y ta tribi di acusa SIMAR di no a percura pa informa nan.

Esunnan prome cu a wordo yama pa duna informacion ta e dunado di trabou segun SIMAR. Nan ta sigui bisa den nan comunicado cu: “SIMAR ta sirbi su miembronan cu ta aporta na e sindicato y a tene varios reunion informativo desde inicio di e trayectorio pa tene nan debidamente informa. Hasta a yega di invita no miembro pa cierto encuentronan, maske no ta SIMAR su deber.” SIMAR ta urgi tur esunnan concerni pa pone nan mes na altura di e desaroyonan aki: “Tene bo mes informa ta bo responsabilidad. SIMAR ta en espera di e formacion di e parlamento nobo y lo urgi esaki pa trata e ley mas pronto cu ta posibel.”

Presidente di parlamento a pidi conseho na Directie Wetgeving
Nos a tuma contacto cu presidente di parlamento pa un reaccion riba e ponencianan di SIMAR entre otro cu ta prefera pa pasa e ley aki den un gobierno y parlamento nobo. Pasobra parlamento actualmente ‘no ta funciona’. Sra, Wyatt-Ras ta bisa, “esey no ta corecto si. Mi sa cu e ley aki mi a pone riba agenda dia 28 di september. Y mi a pone otro leynan tambe riba agenda. Mi a pospone e reunion pasobra cu minister encarga cu financia no tabata na Aruba. Pero ta asina cu dos miembro di parlamento a pidi pa no bin cu reunion publico pa motibo cu como si fuera no por yama gobierno pa bin trata leynan. Eigenlijk mi a haya un carta al respeto anto mi a manda pidi conseho di Directie Wetgeving (DWJZ) pa loke ta trata e punto aki. Pero e ley a wordo poni riba agenda.”

Cu SIMAR kier warda un otro gobernacion pa pasa e ley ta nan punto di bista segun sra. Wyatt-Ras. “E ley a cana su caminda y mi ta corda si cu tabata wardando riba algo pa nos por a trat’e den reunion publico. Y dado momento e a bira asina cu nos tabata tin den e ultimo trayectorio e minister concerni tampoco tabata na Aruba. E ora nos no a trat’e prome cu eleccion. Pero mi a pone diferente leynan pa trata despues di eleccion anto mi a haya un carta di parlamentarionan cu no kier pa trata leynan pasobra segun nan, no por yama ministernan pa e leynan. Siendo cu esey no ta cuadra completamente. Pero pa ta mas sigur mi a pidi conseho al respeto.”

Ta wardando ainda riba conseho di DWJZ y mientrastanto no haya contesta mes, si tin cosnan relevante pa trata den parlamento, mester trata nan. “Pasobra parlamento nunca no tabata lam pa via di cambio di gobernacion. Y parlamento ta un parlamento legitimo pues esey no ta niun discusion. Cualkier dia por habri e reunion aki bek pa sigui trata e leynan despues cu conseho drenta. E tres puntonan pa trata tabata esun aki, e ley di catochi y ley di deurwaarder.”