Siman pasa a sali un noticia di algun maestronan di scol cu a nota cu no a haya e pago manera mester ta. Esey a pone cu docente a tuma contacto cu Simar cu nan keho pa informa cu algo no a bay bon cu nan salario. Presidente di sindicato di maestro a duna un resumen locual a pasa siman pasa.
Presidente di sindicato SIMAR, Josephine Martilia-Albertus, a duna informacion pa locual a pasa siman pasa cu e situacion di e docentenan. Nan sindicato a bay check kico a pasa y ricibi un carta di SKOA, den cual ta splica un cambio di un areglo di pensioen nobo.
Diamars a tuma contacto cu departamento di finanzas pa asina splica miho. Martilia- Albertus a duna di conoce cu en berdad nan a splica cu algo bay robes cu areglo di pensioen, sinembargo e suma ‘no por ta mas cu 100 florin’.
Den e reclamo di e docentenan, nan ta bisa cu a wak un cambio di 500, 1,000 pa 1,200 florin. “Pero pa dia di diamars, docente no a haya un payslip ainda, pues nan a tuma contacto cu financien, anto nos a puntra kico a pasa cu payslip. Nan a bisa cu nan lo wak ainda pa docente haya nan payslip.”
Martilia-Albertus ta bisa ora cu docente a ricibi nan payslip a nota cu nan no a haya pago di nan overtime y toeslaag. Pa es motibo SIMAR a dicidi cu mester tuma accion pa wak kico a pasa.
Diaranson e sindicato a tuma contacto cu DPS (Diens Publieke Scholen) pero ora no a logra, nan a bay cerca nan personalmente. Ora cu nan a yega, e ta bisa cu no kier a atende cu nan. Pa es motibo a skirbi un carta den cual a duna te 4or di atardi pa ricibi un contesta cu splicacion.
E ta bisa cu DPS a manda un carta, unda cu locual e carta ta ‘stipula no ta cuadra cu e berdad’. Nan a check cu e docentenan afecta, y nan a bisa cu locual ta bisa den e carta no ta berdad. Pa es motibo nan a sigui cu dialogo y negociacion cu DPS.
Den e carta ta stipula cu docente lo wordo paga fin di october. “Nos a bisa cu esey no por, pasobra no por warda henter un luna luna y pasobra 50 florin por ta hopi y ta fout di DPS cu tin cu wak pa rectifica esaki.”
Pa diahuebs, sindicato a tene un reunion cu docente di SPO y Colegio. E ta bisa cu docentenan a mustra nan inkietud. Tambe cu nan a haya un mensahe di minister di Enseñansa (kende tabata den exterior e momento ey), den cual el a bisa pa Simar comunica cu docente, cu e ta haya e reclamo di e docentenan husto, pasobra nan a traha nan ora y nan mester wordo paga.
Tambe el a bisa cu lo wak kico a bay fout y tambe pa zorg pa pago drecha mas pronto cu ta posibel. Den transcurso di carta di DPS, nan a bisa cu nan ta haciendo ‘todo por todo’ pa wak kico a bay fout y drecha e pago pa e docentenan. “Nan mester haci calculacion pa ora cu e docente a traha duro p’e.”
Pa diabierna, di parti SIMAR tabata contento pa anuncia cu nan a haya e pago di pensioen riba nan banco. Sinembargo, e ta bisa cu e suma mas grandi, cu ta overtime y toeslag, no a ricibi nada ainda.
Martilia-Albertus a bisa cu nan a haya otro carta di DPS, den cual ta bisa cu e pago lo mester bin ayera, unda cu departamento DPS lo manda calculacion di overuren pa financien y por paga docente.
“Por bisa cu DPS a duna oido y tuma nota na reclamo husto di docente pa locual ta trata nan pago. Cu nan a haci tur cos pa prome cu october cuminsa, nan haya nan bedrag riba nan banco. E ta kita e incertidumbre di docente, cu tin nan tin nan destinacion pa nan placa”, e ta expresa.
SIMAR ta bisa cu nan ta contento cu a logra negocia cu DPS y ministerio di Enseñansa cu a duna oido pa e reclamo di e docentenan. Den caso cu algun docente cu no a mira nada pasa, SIMAR ta pidi pa tuma contacto bek cu nan pasobra nan lo keda monitor y zorg pa tur cos bay manera stipula.
El a bisa cu minister tambe lo wak unda e fout a bay y lo tuma contacto bek cu nan. “Nos tambe kier wak unda e fout ta encera. Nos no a haya informacion unda el a bay y nos no kier pa situacion bolbe pasa den futuro. Danki DPS cu a traha siman pasa overuren pa docente logra haya nan pago. Nos ta keda positivo y spera cu tur cos bay bon.”
