SIMAR kier un reunion mas pronto posibel cu Minister di Enseṅansa Endy Croes, pasobra e ta straṅo cu despues cu ya caba a corta den presupuesto, awor kier corta otro 11 miyon florin.

Asina Presidente di SIMAR, Josephine Albus a bisa den e carta cu e sindicato a manda pa e Minister ayera.

Segun e carta, yana 2020 ex Minister di Enseṅansa Rudy Lampe lo a corta 25 miyon for di e prepuesto di e cartera di educacion, for di Mei pa December 2020. “Despues a sigui cu cortamento di gasto entrante Januari 2021 y ta parse cu no tin fin na e cortamento aki,” Albus a bisa den su carta na e Minister nobo. “Y recientemente Minister a anuncia cu mester bin mas cortamento, di 11 miyon den sector di educacion. Cu e diferente problemanan cu a bin na superficie durante 2020, esakinan mas bien a bira mas pisa awor. Asina serio cu no ta mustra cu nan por mehora,” e Presidente di e sindicato di maestro a continua den su carta.

Como Directiva di SIMAR,a dicidi pa resumi den e carta pa Minister Croes un scala di problema cu a bin ta señala y a agrega na nan informacion nobo cu e sindicato ta ricibi for di esunnan cu ta traha den e sector di enseñansa.

Locual a keda compila ta cu ya docentenan cu ta traha overtime no ta haya esakinan paga ni compensa; docentenan ta perde oranan pa duna les di un materia (consequentemente e tin efecto pa nan salario y funccionamento); ta haci falta di mas trahado di limpiesa na scolnan; docente nan cu ta core stage no ta ricibi compensacion pa uzo di nan propio vehiculo, incluso e gasoline; no tin suficiente docente pa reemplaza maestronan cu ta cay afo pa un of otro motibo; e IB-er, esta e Interne Begeleiderkendesutarea ta pa yuda e alumnodirectamente, no ta lograehecuta e tarea aki pasobra hopi biaha e mester reemplasa un docente cu no ta presente; e asina yama ‘Remedial Teacher.’ esta e docente cu mester yuda un alumno yega na e nivel di materia cu e mester tin , tampoco por ehecuta su trabou si e mester reemplasa un maestro cu no por ta na trabou pa un of otro motibo; tin un falta grandi di maestro y docente cu ta nifica cu no por duna cierto lesnan y esaki ta nifica cu e alumno no ta haya e materia of les necesario; ta nenga tur peticion pa BVVD, cu ta un derecho pa pidi dianan liber special, pa motibo cu trabou mester bay prome; y e implementacion di inovacion lo nifica cambionan drastico y lo trece su problemanan cu n’e pa tur cu ta forma parti di enseñansa na Aruba.

Locual SIMAR ta menciona aki den e puntonan problematico no ta limitativo. Esaki den luz cu docentenan y tur cu ta sostene e trabou di enseñansa y alumnonan ta confronta cu hopi mas problema cu no por keda soluciona lihe. Nos di SIMAR no kier keda sin bisa cu e ausencia di docentenan pa motibo di malesa, ta afecta e continuidad di enseñansa den un forma hopi serio,” Albus a sigui bisa den su carta.

SIMAR, segun Josephine Albus ta para pa enseñansa di calidad y responsabel, cu ta brinda garantia pa un bon futuro pa tur cu ta envolvi. “Basa riba locual a splica den e carta aki, nos di SIMAR ta urgi Minister un reunion pa por duna mas informacion riba contenido di e carta. Directiva di SIMAR lo aprecia pa por ricibi un invitacion mas pronto posibel pa e reunion aki,” Josephine Albus a conclui.