Ayera na bispo di apertura di aña escolar nobo, Sindicato di Maestronan di Aruba (SIMAR) no a haya niun caso ainda di malcontento di scolnan y docentenan.
Presidente di SIMAR, Sheila Tromp a declara na Bon Dia Aruba cu mescos cu aña pasa, nan a cuminsa e aña escolar cu e managernan di EPI. E ta premira cu e aña aki, prome cu apertura di aña escolar nobo, tur cos a bay mas trankil. Sinembargo hopi biaha ora cu e aña escolar ta cuminsa oficialmente, nan ta bay wak kico nan ta bay topa.
“Te cu awe SIMAR no a haya niun notificacion di scolnan of di miembronan cu ta disgusta pa inicio di aña escolar”, asina Sra. Tromp a declara ayera.
SIMAR a compronde cu mayoria di scol a haya nan material pa nan por cuminsa cu ne. E sindicato no a tende cu tin scol ainda cu ta pega cu esaki. Si ta asina semper nan por acerca SIMAR libremente, el a bisa.
Situacion social
Presidente di SIMAR ta haya cu e situacion social den scol ta un di e aspectonan mas dificil cu nos docentenan mester deal cu ne. Tin docentenan cu ta asumi e rol di mama of tata. Tambe tin docentenan cu mester hunga e rol di polis, trahado social, psicologo, etc.. “Un peso masha grandi ta cay ariba e docentenan riba e parti di traha cu mucha y di e ayudo cu e mucha tin mester”, sra. Tromp ta declara.
Docentenan tin cu brinda ayudo psicologico, sin cu nan mes ta prepara pa esaki. Ora cu tin un problema di conducta cu un mucha, tin biaha e mayornan mes no ta habri pa atende cu esaki. Den un situacion asina e docente tin cu deal cu muchanan cu conducta cu tin hopi reto cu ne. Pero ta tristo cu ora nan ta bay pidi ayudo, nan ta topa cu murayanan, entre nan e mayornan cu no kier coopera. Tambe e caminda burocratico pa logra asistencia of ayudo profesional ta un obstaculo pa e docentenan.
Sra. Tromp a indica cu e docente ta haya preparacion den e scol, segun e necesidad di scol pa algo cu bo por traha den scol. Pero e ta mira cu nos docente ta e unico profesional cu tin riba mercado cu no tin un coach y cu no tin un guia pa sigui cu e formacion di maestro. Tambe e problema tin di haber cu aspecto financiero, ya cu tin escasez di fondo pa nan por traha cu ne pa atende cu e problema social aki. Tin biaha den scol nan tin cu percura pa e muchanan tin cu come.
Ayudo di SIMAR
A pesar di e retonan cu e docentenan ta confronta awendia, SIMAR por yuda nan den e parti aki. “E no algo cu bo mester lucha bo so”, el a declara. Vooral si bo ta miembro di SIMAR. Si bo no ta miembro, e ta recomenda pa tog acerca e sindicato pa bo bira miembro di dje. El a trece cu preocupacion cu nos docentenan no sa nan derechonan y nan no ta consciente di nan mesun derechonan. Hopi biaha cosnan ta pasa fout na trabou ‘pero ora cu ta toca na bo, e ora bo ta bin busca bo ayudo.’
E cuerpo di docente di Aruba ta alrededor di 1.200 persona. “E ta un cuerpo hopi grandi si bo ta wak tur e diferente directivanan cu tin y diferente scol.” SIMAR ta conta cu un grupo chikito di miembronan considerando e cantidad di trahadonan riba tereno di enseñansa. SIMAR ta conta cu un grupo activo di miembronan y tambe un grupo pasivo cu ta entre otro pensionadonan cu ainda ta den enseñansa.
P’esey nan ta stimula e cuerpo di docente y muy specialmente e docentenan jong pa nan bira miembro y contribui cu SIMAR cu ta e unico sindicato cu ta para pa maestronan.
