Dia 26 di juli ultimo, Ministerio di Enseñansa entrega un carta na e directiva di scolnan cu a ser manda pa e miembronan di Simar. E carta aki a causa hopi polemica pa motibo cu e carta e ser mal interpreta, segun Minister di Enseñansa, Armando Lampe. Sinembargo, Josephine Albertus Presidente di Simar a splica durante un conferencia di prensa, cu nan lo kier haya un claridad tocante e situacion aki y pa motibo di esey nan a reuni cu Minister Lampe dialuna pasa.
Albertus a bisa cu den e carta cu nan a ricibi ta menciona cinco diferente topico cu nan mester clarifica pa e docentenan. E prome topico tabata tocante lesuren, unda ta skirbi cu un scol ta subsidia placa pa e docentenan y ta depende di e alumnonan cu nan tin, manera Albertus a bisa, nan ta wak cu na reguliere basis y voortgezet onderwijs pa cada 28 alumno e scol ta haya subsidio pa asina paga un docente.
Compara cu regulier kleuterschool, e enseñansa ey ta regarda cu, pa cada 24 alumno, e scol ta haya subsidio pa paga un docente. Di mesun forma, Albertus a declara cu, den practica, esey ta di un manera diferente. Durante e reunion cu minister, a splica nan cu den ley ta stipula cu, pa cada 30 mucha, e scol tin cu haya subsidio; pero door cu den practica no ta asina, nan a baha e cantidad pa 28.
Di dos topico tabata papia di takuren. E ta regarda cu si un docente tin un volledige betrekking, e ta traha 32 ora y den e tempo ey nan por tin 4 takuren so. Pero den practica, Albertus a manifesta cu pa por duna calidad di enseñansa, cierto takuren no por keda solamente na 4 ora. Tocante esaki, Minister a expresa cu pa cada caso, cada docente y cada takuren lo ser evalua.
Di loke ta trata e di tres topico, e overuren, Albertus a declara cu den e carta ta bisa cu “tur overuren di docente lo bay stop”, Albertus a expresa cu un docente no ta traha overtime pa motibo cu oranan ta traha asina y nan mester paga 150 of 200%. Un docente ta traha extra ora y pa e oranan aki nan ta haya 100% di salario.
Ora e docente pasa e 40 ora, despues di 41 of 42 ora esey lo bira un losseuren, cu pa ley stipula un docente por haya un maximo di 36 ora y si e tin cu bay di 36 pa 40, e mester pidi un permiso pa minister cu ta encarga di duna esey. Den e parti di salario cu docentenan a compronde cu nan salario lo baha, Albertus a informa cu minister a laga sa cu no, te cu 40 ora nan lo bay paga e full aña.
Albertus tambe a declara cu nan a puntra Minister di e losseuren, y el a bisa cu esey ta bin door cu un docente ta pasa 40 ora, e lo bira un losseuren, pero tambe tin e parti cu un docente ta traha 32 ora durante mainta y si nan ta traha den oranan di atardi of anochi esey lo bira un losseuren.
Di otro banda, Albertus a splica cu cierto docente ta traha 28 ora, pero nan ta ricibi salario door di volledige betrekking di 32 ora, pero si e docente lo kier traha den oranan di anochi, nan no lo ricibi mas pago tanten cu e no surpasa e tempo di 32 ora.
Verzilvering van niet genoten vakantiedagen cu tambe tabata den e carta cu minister a manda pe docentenan y cual no a ser paga mas, Albertus a expresa cu ta existi cierto caso di scol cu si ta paga esey y otro no, el a sigura cu esey no lo ser paga mas. Na e momentonan aki si un docente tin un niet genoten vakantiedagen e scol tin di duna esey, pa motibo cu mester tuma esaki prome cu e vakantie of despues di vakantie y den aña escolar siguiente.
Pa finalisa, Josephine Albertus a indica cu pa via di mal interpretacion di e carta, minister mester ta mas specifico cu asuntonan asina, tambe el a declara cu miembronan a acerca Simar y asina nan por sali pa nan derecho y nan kier ofrece un enseñansa di calidad pa tur muchanan.
