Te ainda Sindicato di Maestro di Aruba (SIMAR) no tin un posicion cla riba e decision di minister di enseñansa, Rudy Lampe (ReD), pa independisa Scol Publico (DPS) for di gobierno y haci’e un fundacion.
Nan a sostene un par di reunion pa scucha e vision di e mandatario riba e cambio di status di scol publico na Aruba. Sinembargo pa SIMAR ta importante pa evalua esaki for di diferente punto di bista pa asina hunto cu nan miembronan adopta un posicion riba e cambio aki.
Siman pasa nan a reuni cu minister Lampe y su consehero, den presencia di sindicato SEPPA cu tambe ta representa un grupo grandi di maestronan y trahadonan na servicio di scol publico.
Presidente di SIMAR, Sheila Tromp a declara cu nan ta spera cu prome cu un luna, nan por logra di bin cu un posicion. E sindicato ta haciendo su trabou, ya nan a tene un reunion general cu su miembronan pa duna detayenan di e reunion cu nan a sostene cu e minister. Igualmente nan lo reuni cu nan miembronan bek pa bin cu nan punto di bista.
Presidente di SIMAR a declara na e matutino aki cu akinan e sindicato no ta bay concentra solamente riba e trahadonan di scol publico, sino cu tur trahado den principio cu ta miembro di SIMAR, pasobra ta bay tin votacion y logicamente e miembronan tin derecho di vota.
E ta probecha pa haci un yamada pa nan tur ta presente y pa nan tambe informa nan mes. Si acaso mes ta cay un decision, esaki depende di e punto di bista di SIMAR ya cu e ‘sindicato aki ta bos di su miembronan’. Mirando cu tin tiki tempo, mas lihe cu nan por concilia un posicion, mas lihe SIMAR por traha riba dje.
Sinembargo den e reunionnan cu nan a yega di sostene cu minister Lampe, SIMAR a laga sa cu esaki ta e comienso di diferente dialogo riba e topico aki. Si tin mas reunion solamente cu e cabesantenan di scol y/of e directiva di scol publico, pa SIMAR e reunion sosteni te aworaki ‘no ta e prome ni e ultimo cu nos ta bay traha riba e topico aki’.
Centro multi-disciplinario
Nan a trata cu e mandatario algun puntonan pendiente y nan a haya aclaracion riba algun pasonan cu e minister ta tumando den e reorganisacion di enseñansa. Un preocupacion cu SIMAR a trece dilanti tin di haber cu ta existi un discrepancia entre scol publico y e otro fundacionnan pa cual ta e asistencia di un team multi-disciplinario. Aunke no tin specificamente un team ainda, si tin scolnan publico cu tin alrededor di 10 trahado social pa menos cantidad di scol compara cu SKOA cu tin tres trahado social pa e mayoria di scolnan.
Pa atende cu e situacion aki, minister di Enseñansa a bin cu un team multi-disciplinario na disposicion di SKOA. Pero SIMAR su preocupacion tabata ta, kico ta bay pasa cu e centro multi- disciplinario cu ta existi caba.
Nan a haya splicacion for di e mandatario riba con e centro a wordo forma y kico e lo ta actualmente. Den e centro tin un klas pa observa cu e muchanan cu tin problemanan grave di conducta. “Pero nos por a compronde cu esaki no tabata e idea original pa kico a forma e klas y pa loke awe ta wordo uza”, segun presidente di SIMAR.
Nan a pone e asunto aki on hold, ya cu SIMAR ainda no por bisa si e cambio aki relaciona cu e centro multi-disciplinario ta bon of no ta bon. Pero si nan ta informa nan mes kico ta pasando cu e instancia aki. E ta haya cu scol lo por tin mas accesibilidad na un team multi-disciplinario cu e sistema actual.
