Diamars 24 di mei den oranan di atardi e grupo di sindicatonan SIMAR, SEPPA, SADA, SPA y organisacion OPPA a tene un manifestacion pa demostra nan malcontento cu e situacion cu ta rondona no solamente e empleadonan publico y semi-publico pa loke ta trata e recorte salarial, pero tambe pa demostra cu Gobierno di Aruba no tin e interes di pueblo presente.

Despues di e manifestacion aki, e grupo di sindicatonan a tene un reunion cu Secretaria di Estado, Alexandra van Huffelen na Aeropuerto Internacional Reina Beatrix. Presidente di sindicato SIMAR, Josephine Albertus, a elabora ariba e puntonan cu a bin durante e reunionnan aki y ki informacion adicional e sindicatonan a ricibi.

“Nos kier gradici tur hende cu e demsotra nan sosten. Y tambe danki na tur esnan cu ta apoya nos desde comienso. Esaki ta yuda ora nos a sinta cu Secretaria di Estado pa demostra cu e mal contento no ta algo di e sindicatonan so, pero ta algo cu e pueblo y veld ta carga”, Albertus a expresa.

Albertus a splica cu durante e reunion cu van Huffelen diferente punto a sali na cla pa e sindicatonan. Un di e puntonan cu mas a asombra e grupo di sindicato y cu nan ta lamenta ta cu durante e reunion, Van Huffelen a informa cu e gelijkbedrag di e pensionadonan cu tin derecho riba dje y cu Gobierno di Aruba ya caba tin dos aña ta kita 50% di dje, nunca tabata algo cu Hulanda a pone como condicion. E recorte aki ta algo cu Aruba a dicidi riba su mes.

“Loke ta di lamenta tambe ta cu Gobierno di Aruba a sali y vocifera cu e 50% di e gelijkbedrag cu a ser kita di e pensionado cu tin derecho riba dje, cu esey tabata un exigencia di Hulanda. Atrobe nos ta wak cu Gobierno di Aruba no ta sincero, no ta papia e realidad”, Albertus a agrega.

Otro punto cu e sindicatonan a wordo informa di dje durante e reunion, ta cu despues cu e Secertaria di Estado a sinta cu e grupo di sindicatonan na februari na unda nan a vocifera e preocupacion- y dolornan di diferente punto, Van Huffelen a sinta den Rijks Ministerraad y a logra trece e puntonan cu e sindicatonan a presenta pa dilanti. Di e forma aki nan a yega na e conclusion y a dicidi cu Gobierno di Aruba por kita e 12.6% completo y nan por dicidi esaki mientras cu nan tene cuenta cu e tres exigencianan cu nan a ricibi for di Hulanda.

E tres exigencianan aki ta: Gobierno di Aruba mester cuminsa pasa e ley di e Wever-Croes Norm y cuminsa implementa esaki. E suma di e recorte salarial di 12.6% cu lo mester duna back na e trahado mester sali for di e presupuesto di Aruba mes, Hulanda no lo manda placa pa esaki. Por ultimo tur Minister y Parlamentario mester keda entrega 25% di nan salario.

Esaki, Albertus a indica, ta un bon noticia pa e sindicatonan pasobra cada biaha cu nan sinta na mesa cu Gobierno di Aruba nan ta tende for di gobierno cu nan mester check cu Hulanda of cu Hulanda tin cu dicidi. Pero Secretaria di Estado Van Huffelen a informa cu nan no tin nada di dicidi, gobierno a haya e condicionnan caba y ta Aruba mes ta dicidi.

Albertus a menciona tambe cu ta Gobierno di Aruba mes dicidi cu nan no ta duna e 12.6% back, pero cu nan ta bay duna 5% so back. “Eynan atrobe por wak cu Gobierno di Aruba no ta sincero cu e clase trahado, no ta sincero cu e pueblo ora cu nan vocifera y bisa locual nan ta bezig cune”, el a señala.

Albertus a remarca cu nan a tuma e oportunidad, mirando cu nan manifestacion no tabata solamente pa e recorte salarial di 12..6%, pero pa e ser humano wordo poni central, pa vocifera nan preocupacionnan ariba diferente reformanan cu actualmente ta andando den comunidad.

“Ta di lamenta cu nos tin representantenan den gobierno cu ta sinta negosha den nomber di pueblo, pero ora wak kico nan a negosha e no ta den interes y no ta cuadra cu e situacion real cu e pueblo ta aden y nos kier pa nan tene cuenta cu esaki tambe pa ora e reformanan bin pa nan por yega na metanan pasobra lamentablemente Gobierno di Aruba y Parlamento di Aruba a mustra cu nan no tin interes di e ser humano na prome luga. Nan ta pasa presupuesto cu no ta realistico, nan ta pasa presupuesto subiendo e costo y despues di otro banda ta pidi pa pueblo tin pasenshi”, Albertus a enfatisa.

Por ultimo e presidente di SIMAR a subraya cu e manifestacion y e reunion cu Secretaria di Estado tabata exitoso y durante e reunion nan a haya hopi informacion extra pa aworaki na momento cu nan bay sinta na mesa cu Gobierno di Aruba, nan por representa e veld na un manera responsabel digno y cu respet.