SIMAR a tuma nota di un comunicado di Sr. Rene Herde titula “Keda sinta ta keda un problema”.
Ta di lamenta cu den e comunicado Sr. Herde ta practicamente ataca tanto e maestro di enseñansa basico, como e sistema educacional di Aruba sin menciona e factornan cu en realidad tin e porcentahe di muchanan cu ta “ripiti aña” halto.
Ta asina facil pa tira tur responsabilidad riba e maestro, pero e problema aki tin factornan hopi mas profundo cu nos no mester perde for di bista.
Mester subraya cu hopi maestro no ta uza e concepto “keda sinta” mas, ya cu esaki a bira un forma negativo pa nombra e hecho cu un mucha mester “ripiti e aña escolar”.
Prome cu dicidi cu un alumno mester ripiti un aña, ta midi e factornan necesario di cerca y na un manera responsabel durante henter su desaroyo a base di diferente norma.
E motibo principal pa laga ripiti aña ta cu un alumno no ta cla pa sigui cu e siguiente pakete di materia cu lo ofrece den e aña escolar nobo. Banda di esaki e desaroyo social y emocional tambe ta di suma importancia. Mas cu claro tur maestro ta desea di por a tende cu klasnan cu ta keda forma den e mesun constelacion y pa tur mucha bay dilanti. Pero muchanan cu pa cierto materianan a keda atras durante e aña of no a compronde cierto partinan, mester di guia personal individual y atencion extra. Pa e muchanan aki mester diferencia. Por cierto mescos ta conta pa esnan cu ta bay mas lihe cu demas muchanan. Nos klasnan ta hopi grandi; 25, 28, 30, hasta 32 alumno. Mayoria di scol no tin assistent di enseñansa den klas niun“remedial teacher”pa henter un scol pa yuda cu e muchanan aki pafo di klas no ta suficiente.
Nan ta haya e atencion debido y maestronan ta haci nan maximo esfuerso, pero cu klasnan mas chikito, cu assistent di enseñansa y cu mas “remedial teachers”sigur e mucha nan cu na un cierto momento keda pega lo por yega mas leu.
Tin maestro ta di opinion cu ta frustrante pa un mucha wak su amiguitonan pasa pa un otro klas, mientras nan mes ta keda atras. Pero ta mas frustrante pa e mesun mucha aki bay cu su amiguitonan, caminda e lo no por funcion ariba e mesun nivel cu nan.
Un otro problema grandi na scolnan ta e procedura di test un mucha. Dos factor grandi cu ta hunga un rol den esaki ta cu mayor mester bay di acuerdo y e lista largo di espera.
For di scol preparatorio te cu scol basico tin cu lucha pa mustra e mayor e importancia pa un mucha pasa test pa por saca afo si e lo mester repasa su ultimo aña di scol preparatorio of si e lo funciona miho den un otro tipo di enseñansa cu no ta esun basico. E fase di aceptacion por ta largo cu consecuencia cu hopi mayor no ta firma pa e test tuma luga. Tambe, pa motibo cu no tin profesional suficiente pa haci e testnan y, e muchanan nota yega na remarca na tempo y ta drenta enseñansa basico sin cu nan por funciona hunto cu demas muchanan. Esakinan hopi biaha ta esnan cu lo repasa aña y lo “struggle” cu nan enseñansa.
Sr. Herde ta menciona diferente punto cu ta relaciona cu “scol, e maestro, e manera di pensa y traha y enseñansa na Aruba”.E sistema, su reglanan, normanan, control y financiamento ta den man di gobierno: Minister di Enseñansa, Departamento di Enseñansa y Inspeccion di Enseñansa. Nos no por nenga cu maestro y cabesantenan ta ser involucra den e desaroyonan di tal, pero hopi biaha no ta scucha esnan cu ta directamente involucra cu e alumnonan.
Loke tambe ta resalta ta cu Sr. Herde no a menciona e problemanan social di pais,cu ta bin scol tur dia hunto cu hopi di e alumnonan. Pa menciona algun: embaraso hubenil (mayornan hoben cu tin cu guia e alumno, mientras cu nan mes mester di guia), divorcio, famianan kibra y desfuncional, hamber, falta di recurso, abuso di tur forma, falta di norma y balor, falta di respet, educacion di nivel abou y inmigracion. Tur esakinan cu tur consecuencia cu nan ta trece hunto cu nan den e cura di scol. Hopi biaha e muchanan cu ta repasa aña ta esnan cu ta biba den un situacion caminda tin problemanan social. Esaki ta ocasiona cu gran parti di tempo di un dia escolar ta ser dedica na educa of atende conducta no desea na luga di duna enseñansa.
Band’i di tur esaki nos tin cu menciona e problema di idioma. SIMAR no tin mester di ripiti cu hopi di nos muchanan tin problema cu e idioma Hulandes. Idioma no materno cu mester ser uza como idioma di instruccion na scol. Y esaki mas cu claro ta forma un barera grandi pa e alumnonan. E falta di confiansa den nan mes y e obligacion di expresa nan mes den un idioma no materno, cu nan no ta domina, ta causa cu hopi ta scoge pa no haci esaki mes pa no faya of pasa berguensa. Sigur esaki tambe porta un di e motibonan cu ta pone cu un alumno mester repasa aña.
Inversion den enseñansa.
Sr. Herde ta menciona den su comunicado cu gobierno ta inverti mas di 20% di su presupuesto na enseñansa. Ta bon pa Baba menciona cuanto di esaki ta bay na personal (salario y desaroyo), cuanto na infrastructura y cuanto ta bay na “enseñansa”mes. Tanten cu maestronan ta inverti placa di nan saco den nan alumnonan (specialmente den enseñansa primario), tanten cu mester cremencha pa material y sobrevivi cada aña escolar cu un suma cu no ta cuadra cu realidad di e costonan di tal, tanten cu scolnan mes ta recauda fondo pa “update” nan klasnan cu tecnologia y tanten cu nos no tin e medionan adapta na e velocidad di desaroyo di nos mundo di awe, nos no por papia di inversion suficiente“den enseñansa”.
SIMAR ta di opinion cu tanten cu no haci un sondeo oficial no por confirma cua ta e motibonan cu e porcentahe di e muchanan cu ta repasa aña aki na Aruba ta halto. Pero SIMAR ta convenci si cu tur e puntonan menciona ta parti di e resultado di desaroyo di un mucha, cu no necesariamente ta e sistema ni e maestro y su manera di traha y pensa.
