Fin di siman cu a pasa, Cuerpo Policial tabata basta activo riba caya na unda nan a informa tocante diferente incidente cu a tuma luga, entre nan un homber cu a ser alcansa pa un tiro na su curpa na Pos Chiquito.

Diabierna ultimo, mediante un comunicado Cuerpo di Polis a informa cu un homber di 22 aña tira na Betonicastraat y tin dos detencion. Diabierna pa 8:43 di anochi central di polis ta wordo notifica di un caso di tiramento. Segun e prome informe cu un homber lo mester a yega un cas na Betonicastraat cu tiro na curpa.

A despacha diferente unidad di polis na e sitio di e sucedido como tambe a avisa ambulance.

Na yega di e prome unidad policial a acumula informacion di e victima. E victima ta informa polis cu un auto color shinishi y un auto suv color preto lo a para y despues personanan a baha di e auto y a los diferente tiro riba e grupo na unda e victima tabata cu ne. E victima a wordo alcansa pa e tiro na su curpa.

Recherche como tambe departamento tecnico a presenta na e sitio pa asina haci nan investigacion. Ambulance a trata e victima y a hib’e hospital pa atencion medico avansa. E victima su situacion tabata stabiel.

Un rato despues unidad di motorisa como tambe K-9 Unit ta topa cu un auto marca Hiunday Getz color shinishi na unda a bay over pa stop e pa controla. E auto Getz a cuminsa core pa polis y na unda ta dal den dos auto y sigui bay direccion rotonde Pos Chiquito. Unidad motorisa a logra para e auto y na unda 4 persona masculino ta baha di e auto y huy pa polis.

Polis a logra detene 2 sospechoso y a logra haya un arma di candela tambe. E auto Getz a keda confisca tambe pa mas investigacion.

Diabierna ultimo den oranan di atardi Unit Narcotica a tene un accion policial un biaha mas pa loke ta trata bendemento di droga.

Unit Narcotica a haci dos entrada hudicial, un na Milonstraat y e otro na Pindastraat.

Na Milonstraat a detene e persona di inicial Q.N.S.H.P di 42 aña y na Pindastraat a detene e hende muhe di inicialnan R.T.T di 59 aña, un otro hende muhe D.J.H.P di 39 aña y e hende homber S.A.A.S di 23 aña.

Na e entrada hudicial a haya diferente droga entre otro cocaina, marihuana y xtc.

Durante e entrada hudicial diferente departamento di Cuerpo Policial a forma parti entre otro Team di Aresto, Flex team y Polis uniforma. Nan a informa cu e accionnan aki lo continua y no ta descarta cu lo tin mas detencion.

Ademas, siman pasa Departamento di Crimen Organisa (UGC) a dal baho mundo un golpi pisa, unda team di aresto a haci tres entrada hudicial conhuntamente cu diferente departamento policial.

E casnan na unda a haci e entrada hudicial tabata Ponton, Savaneta y Seroe Janchi.

Durante e entrada hudicial a detene 4 sospechoso. Ta trata di inicialnan R.F.D.P, K.A.C, D.E.R.A y L.A.R.T

A confisca un cantidad grandi di droga, telefon, drone, partinan di drone y dos auto.

Durante e accion aki diferente departamento a yuda, entre otro Team di Aresto, Flex-team, Mobiele Eenheid, Polis forensico y Ministerio Publico.

Y finalmente, diasabra ultimo den oranan di merdia Unidad Motorisa a tene nan control riba diferente puntonan strategico pa asina haci control riba e velocidad den trafico.

Den esaki, a controla 200 auto, den total di 31 chauffeur a haya multa pa maneha cu velocidad halto y a detene un chauffeur pa maneha bao influencia.

Controlnan lo sigui durante fin di siman y ta haci un apelacion na tur automobilistanan pa nan tin nan papelnan di auto na ordo como tambe nan rijbewijs.