Den e dianan nos dilanti entre 23 di september y 30 di september automobilistanan por tuma nota di luznan color cora riba e monumento di Bestuurskantoor, na rotonde dilanti di WEB y tambe na e toren di Aeropuerto Internacional Reina Beatrix. E luznan cora aki ta den conexion cu e siman mundial di curason. E meta di e luznan cora ta pa yama atencion di tur hende riba malesanan di curason cu por perhudica nos salud.
Combati e malesanan cardiovascular sigur ta importante pa cada curason cu ta bati. Conscientisacion ta un parti hopi importante den cuadro di e plan nacional di prevencion di malesanan NCD’s.
Un di e causanan cu mas ta afecta nos curason ta presion halto, esaki por wordo combati door di hiba un bida mas saludabel. Presion halto ta afecta mas cu 30% di adultonan rond mundo, cu ta encera mas cu 1 biyon persona. E ta e factor di riesgo principal di malesa di curason (cardiovascular, specialmente malesa coronario y stroke (atake celebral), pero tambe malesa di riñon cronico, problema di curason, aritmia y demencia. Esaki ta e motibo cu Minister Dangui ta urgi comunidad pa sigui haci nan testnan di presion, haci bo chekeo mediconan regularmente pa preveni cualkier tipo di malesa.
Ministerio di Salud Publico su maneho ta basa riba prevencion. E siman aki ta pa refleha y pa promove un cambio den nos estilo di bida, pa hiba un bida mas saludabel y mas activo. Esaki por preveni malesanan cardiovascular, ataca di curason of stroke.
