Oficialmente, diabierna ultimo 17 di juni a tuma luga e apertura di Weganan Escolar “We Aruba” , un concepto nobo unda cu Gobierno di Aruba hunto cu diferente instancia y IBISA a traha hunto pa por trece e proyecto aki na bida pa muchanan por practica deporte.

For di 17 di juni te cu 25 di juni lo tin diferente weganan y competencia di diferente deporte como voetbol, badmintong, baseball, beach tennis, entre otro cu lo competi den diferente luganan pa asina clasifica pa wak ken ta e scol cu lo sali como ganado unda cu tin por lo menos 750 mucha participante durante e siman aki.

Lo tin tambe competencia di baile deportivo/cultural di den Cas di Cultura di cual Departamento di Cultura ta completamente encarga cune. Den e categoria di baile cultural lo competi scolnan preparatorio y basico, y scol avansa lo competi den categoria di baile deportivo.

Lo tin premio cash tambe pa e scolnan cu lo gana, aparte di medaya pa e muchanan cu ta participa, lo tin premio efectivo pa e scolnan cu lo haya e puntuacion mas halto. Mas deporte un scol ta participa den dje, mas oportunidad e tin pa haya punto y asina gana e premio cash. E idea tras di e premionan efectivo ta pa e placa wordo inverti back den e scol.

Den e apertura tabata presente e deportista Arubiano Denzel Dumfries hungado profesional di futbol na exterior ademas di prome minister, ministernan di Gabinete Wever-Croes como tambe parlamentarionan.

Despues di un desfile hopi bunita di e muchanan participante di 35 scol cu a clasifica , prome minister Evelyn Wever-Croes a dirigi algun palabranan unda el a gradici na esunnan cu a haci posibel e weganan aki despues di dos aña di pandemia.

“Deporte ta trece nos hunto, pasobra ora nos mira nos muchanan, hobennan of nos adultonan den deporte bo ta mira cu no tin distincion, tin union y e union aki den deporte y enseñansa ta lo cual cu nos kier logra, pasobra uniendo forsa nos por logra mucho, mucho mas”, prome minister a expresa.

Tempo di Covid-19 tabata un tempo dificil pa tur hende, specialmente pa muchanan y deportistanan cu mester a keda cas cu no por a bay scol, no por a practica deporte y pa e motibo aki, saliendo for di e pandemia di Covid-19 el a pidi pa esnan presente pa haci e forsa cu deporte ta duna, pa muchanan haya speransa, perspectiva y balor pa comparti alegria fomenta deporte.

Durante un conferencia di prensa di luna pasa, minister Endy Croes a splica cu desde aña pasa nan ta planificando e proyecto aki conhuntamente cu IBISA, cu practicamente ta e motor tras di WE Aruba 2022 pa coordina tur aspecto di e weganan, for di januari caba a cuminsa cu e weganan, e competencianan den e diferente categorianan.

Minister Croes a señala cu Aruba ta saliendo for di un pandemia cu a laga hopi cicatriz atras den hopi hende y a pesar di e retonan financiero, den un manera creativo nan ta logra pone tipo di proyectonan manera WE Aruba na beneficio di e muchanan y crea oportunidad pa haci deporte. “Nos tin un pasion pa deporte. Nos ta kere cu deporte ta sano, e ta e vehiculo cu ta conecta nos cu otro”, el a subraya.