Gobierno di Corsou ta presenta Siman di Cultura 2022, carga cu actividadnan pa pueblo di Corsou por disfruta y siña mas di nos Cultura. E aña aki lo combina Siman di Cultura cu e promocion di Metanan Sostenibel, e asina yama Sustainable Development Goals (SDG’s). Siman di Cultura ta di 25 di september pa 2 di october. E tema di Siman di Cultura ta:“Ban Cunucu ban Planta”.
Durante di celebracion di Siman di Cultura, nos ta continua cu e strategia pa conscientisa nos comunidad riba topiconan cu ta stimula bienestar pa pueblo di Corsou y e aña aki nos lo conscientisa riba e tema di plantamento.
Minister di Enseñansa, Ciencia Cultura y Deporte, sr. Sithree van Heydoorn ta preparando hunto cu Sector di Cultura y Deporte actividadnan pa scolnan, barionan for di Band’ariba te Band’abou pero tambe den Luna Blou. Tambe ta uni forsa cu e Comision Nacional cu ta promove implementacion di metanan sostenibel pa Corsou pa asina pone enfasis riba cultura y futuro. E motibo cu ta combina e Siman di Cultura cu e Siman di Accion pa metanan sostenibel, ta pa e echo cu anualmente mundo y tambe na Corsou ta para keto durante e luna di september riba e metanan pa desaroyo sostenibel. E diferente SDG-nan ta promove bienestar di hende, planeta, prosperidad y cultura ta core manera un liña cora den e esfuerso pa logra e metanan aki.
Cu e tema “Ban Cunucu Ban Planta”, Gobierno di Corsou ta pone tension, riba e preocupacion cu tin den comunidad cu mester bin bek cu plantamento, cosecha y produccion di nos mes cuminda. E nificacion di “Ban Cunucu ban Planta” ta keda ehecuta tanto den su concepto literal como den su concepto figurativo durante di e siman di cultura. Den su contexto real kier logra sigui stimula pueblo pa planta y cosecha pero tambe comemento salud. E dimension figurativo ta mas riba e area di e dimensionnan di Bienestar pa nos presente y futuro, nos mester sigui stimula nos pueblo pa nos cosecha un pueblo mas Sano, Salud y Sigur.
Pa fortifica y promove e metanan sostenibel e comision encarga cu esaki lo promove durante di 23 pa 30 di september 2022, actividadnan manera entre otro webinarionan, training y tayernan. Esakinan ta pa halsa e consciencia y halsa e participacion activo di e pueblo di Corsou riba e diferente SDG-nan cu ta promove bienestar di hende, planeta y prosperidad.
