Siguridad ta un factor importante pa turistanan Europeo bin Aruba

Pa dos dia consecutivo, diaranson y ayera, Aruba Tourism Authority (ATA) a organisa un vitrina turistico na Hilton Hotel, den cuadro di Aruba Meets Europe 2016.  

Sr. Jaap Ellis kende ta Sales & Marketing Manager di ATA na Europa a declara na Bon Dia Aruba cu e vitrina aki a conta cu presencia di 40 operador di tour cu a bin Aruba despues di dos aña, ya cu e evento aki ta tuma luga bi anualmente.

Nan ta e top operadornan di tour di Europa cu a wordo invita pa nan tin un contacto directo cu nos producto turistico. Pero tambe pa nan siña y wak e cambionan y producto nobo cu nos tin riba nos isla, ya sea hotelnan, actividadnan, restaurantnan (gastronomia), etc… 

Interes ta grandi

Sr. Ellis a laga sa cu interes ta grandi pa nos producto turistico na Europa. Un factor importante  ta “cu tur cos cu e turista Hulandes kier, nos tin nan”, el a bisa. E ta un combinacion di beach, bon cuminda, cordialidad di nos hendenan y specialmente e parti di siguridad.  

E echo cu otro destinacion manera Egipto como Turkia cu ta atrae hopi di e turista Europeo ta pasando den un reto pa motibo di siguridad, definitivamente esaki ta un factor cu ta yuda pa e Europeonan lo por considera Aruba como un destinacion pa nan por disfruta di nan vakantie. 

El a bisa cu e fluho no ta uno den masa ya cu Aruba ta un producto totalmente diferente cu Turkia of Egipto, ya cu nos producto ta uno mas caro. Aruba su prijs ta un tiki mas caro cu otro islanan di Caribe. Nos ta pone enfoke mas riba turista cu facilidad economico. El a bisa cu nan sa unda e turistanan aki ta y nan ta atrae nan pa medio di campaña cu ta coriendo regularmente tur aña. 

El a haci enfasis riba e punto di siguridad cu Aruba ta gosa di dje pasobra na Europa actualmente ta pasando den un temporada dificil y di siguridad pa causa di e terorismo. “E hendenan ta busca eigenlijk luga nobo pa bay. Luganan cu nan por bay cu nan famia cu ta safe”, el a bisa na e matutino aki.
Un aspecto importante di e turista Europeo ta cu ya sea fei Amsterdam, London, Berlin y/of Franfurt nan por bay tur caminda di mundo, segun sr. Ellis. Ademas e preferencia riba nos producto turistico ta inclui tur generacion, y no  solamente e generacion nobo di e milenio. 

AME 2016 ta wordo organisa door di Aruba Tourism Authority (A.T.A.) den colaboracion cu AHATA y partnernan local. A.T.A. tin representacion na Hulanda, Alemania, Italia, Inglatera, Scandinavia y Italia. Segun World Travel Monitor, e biahero Europeo cu ta biaha pafo di nan continente a aumenta cu 3% durante 2013. Un audiencia di mas cu 274.5 miyon turistanan Europeo ta biaha anualmente.