Siguridad publico mester ta prioridad….Situacion na KIA ta menasa publico

Den e siman aki nos por a presencia atrobe un caso di huida di preso for di KIA, cu felizmente a haya su final dentro di un tempo record. Mientras di un banda mester felicita e cuerponan uniforma cu a percura pa esey, mester constata tambe cu atrobe aparentemente presonan ta den un situacion tal, cu nan por trankilamente organisa nan salida for di prizon, cu ayudo y complicidad di personanan pafo di KIA. Cuanto cooperacion talbes nan lo a haya di paden mes, no ta conoci pero por resulta di e investigacion cu lo ser haci, si nos ta comprende palabranan di ministro encarga cu Husticia bon. Segun el a declara mester por a preveni e huida aki y nos  ta di acuerdo cun’e.

Pero den mesun rosea mester pensa riba e sucesonan di algun tempo pasa, unda e como ministro a bay diametralmente contra e personanan na mando cu tabata desea di introduci cambio importante pa contra aresta hustamente e tendencia negativo aki cu tabata bira un menasa pa preso cu ta comporta nan mes corecto, pa personal cu ta comporta nan mes corecto y pa publico pafo ora preso cu ta huy por ocasiona situacionnan peligroso pafo di KIA unda hasta bida di ciudadano por core peligro. Pa suerte di tur hende den e caso actual e preso cu a huy a tuma pa lama, den un intento talbes pa logra sali di Aruba. Otro situacion lo tabatin si e huida a hiba nan den un bario residencia cu tur e peligro cu esaki lo a ocasiona. Kico anto ta nos interes cu preso den KIA ta keda den KIA? Exactamente esey: nos ta pagando hende pa cuida nan pa nan no sali prome cu tempo, pasobra nan ta eyden pasobra hues a dicidi cu nan mester pasa un cierto tempo eyden como castigo. Anto nos ta paga e salario di e ministro pasobra e ta esun politicamente responsabel pa tur cos cana bon; cu e medionan financiero cu mester t’ey tambe y cu si ta necesario, e na nos nomber mester bringa pa e medionan aki, si acaso su propio gobierno no ta percura pa esaki. Nos por a mira e aña aki con gabinete Eman a corta mas di tres miyon florin riba presupuesto di Husticia y nos no a tende e ministro aki, cu no ta conoci como timido, pa nos no bisa mas, halsa su bos contra e cortamento den e presupuesto cu e mester pa hiba un maneho adecua.

Apenas e firma di Gobernador a seca riba e ley di presupuesto 2016, cu ya nos ta confronta cu e realidad cu, si nos ta desea di mira un situacion adecua na KIA, anto esaki ta bay costa placa. Nos por acepta esey como realidad, pero no lo ta mas cu e comienso. Pasobra placa den man di hende cu no ta kere den cambio positivo, o ta kere cu por logra algo manteniendo e situacion actual den e centro di detencion aki, lo ta placa benta afo. Y despues di e despedida rapido di Sra. Hassell for di e puesto di director di e instituto aki, ta na e ministro pa convence e comunidad aki ta na cua banda e ta para. Pasobra den tur prizon na mundo tin dos categoria di persona cu ta cay necesariamente bao di un regimen di control estricto, pa bon di tur hende: nan ta e bishitantenan y e personal cu ta traha den e institucion. Y pakico? Esey tambe ta mescos tur parti di mundo: preso ta desea di tin entre otro placa cash, celular y droga. Y e mannan cu por pasa e mercancia pa nan, ta conoci y conta. Naturalmente esey no ta bisa nada ken ta corupto y ken no. E no ta bisa nada di ken ta famia cu ta bin di bishita cu bon intencion so y no ta purba pasa nada ilegal pa nan ser keri. Pero manera tur parti di mundo, hende cu bon intencion nunca tin un problema pa somete nan mes na control riguroso. Al contrario, nan ta e prome pa reconoce cu e medidanan di siguridad aki ta necesario y mester impone nan. Kico esey ta significa pa esnan cu ta protesta contra un regimen mas estricto riba entrada di tur sorto di material cu no tin nada ta haci den un prizon? E pregunta na nan mester ta cu si nan ta pertenece na e grupo di hende di comportacion corecto, kico anto nan tin contra regla estricto. Bo tin algo di sconde anto?

Nos ta contento di tende cu ministro di Husticia, despues di e ultimo incidente aki, lo laga investiga kico exactamente a sucede. Pero nos ta spera alabes cu e no ta keda na esey so. Ta inevitabel cu mester bin un miho regimen di control pa preveni e tipo di escapada aki, no solamente pasobra de por si mester evita esaki, pero tambe y principalmente pasobra den cierto situacion e por ta un peligro pa e ciudadano cu ta paga pa e cosnan aki no sucede. Nos ta keda pendiente.