Den nos edicion di ayera un interesante entrevista cu e iniciador di e proyecto di rehabilitacion di e refineria, cu no ta un persona desconoci na Aruba, ya cu e tabata un di e organisadornan di diferente festival di musica aki, cu durante varios aña a atrae bastanTe publico di exterior. Awor sin embargo nos ta topa e persona den calidad di representante di e consorcio recien forma, Quanten LLC, cu a gana preferencia di gobierno di Aruba y e propietario directo di e instalacionnan di e refineria, Refinaderia di Aruba NV, pa desaroya e area.

E plan ta hopi ambicioso, no solamente pa loke e plan ta encera, sino tambe pa e circunstancianan general cu ta haci henter e sector petrolero mundial un reto grandi na e momento aki. Riba e aspectonan aki ya ta surgi cierto diferencia di opinion, unda e optimismo di e iniciador ta contagioso pa esnan cu ta comparti esey, y revelador pa su ingenuidad pa esnan cu ta destila un opinion contrario for di e situacion internacional, cu ta yega na nos a traves di un sinnumenro di publicacion reciente, cu ta indica tendencianan generalmente negativo pa sector petrolero rond mundo.

Sin embargo, manera ta nos tarea como prensa, nos a simplemente publica e contesta di e representante riba nos preguntanan. No ta mezcla su opinion cu esun di nos, sigur no pasobra nos tin varios aña ta sigui e situacion di e refineria na Aruba, den su contexto internacional, manera nos ta mir’e. Ta p’esey nunca nos a kere den e soño infantil cu gobierno anterior kier a bende nos, hunto cu e banda criminal mas grandi di historia di e continente aki. Y no pa e caracter criminal di e regimen bisiña, sino mas bien pa e realidad di e sector na e momento ey caba. Ta e mesun realidad ey nos ta tuma awor como punto di salida, y e no ta asina alentador manera e anterior impresario musical ta trata di pinta. Naturalmente ta berdad, manera e ta bisa, cu petroleo lo t’ey pa hopi decada mas, y cu ta necesario cu aki tanto aña ainda tin refineria. Esey sin embargo no ta implica cu drecha un di esunnan mas bieu lo ta e forma di inverti, desde awe. Nos ta hustamente den e etapa global unda ta termina operacion den un cantidad grandi di refineria di propiedad di e companianan lider global, pasobra a lo largo no mester di tanto capacidad mas. E apreciable representante ta mustra riba e hecho cu ainda ta continua cu exploracion y explotacion di recurso petrolero, pero ta saca e conclusion eroneo cu esey ta pa aumenta fuertemente e uso di petroleo; mas bien e ta pa mantene e oferta actual. Tur e lidernan global den petroleo ta keda den e sector, y simultaneamente a cuminza reorienta parti considerable di nan recursonan strategico den direccion di energia renovable.

Unda mas nos ta haya e ponencianan di e representante dudoso, ta unda e ta papia di “converti’ e refineria den algo distinto, ora cu ya no mester di esaki mas. Aki ta sali na vista e falta di conocimento di e persona aki, cu kier pa nos kere cu ora e refineria nobo aki bira obsoleto aki 20 aña, anto ta cambi’e pa algo di energia alternativo. Nos lo tin gana di entrevista e ingenieronan cu ta domina e conocimento di conversion aki, pasobra profesionalmente nan lo a gana e jackpot di ‘innovacion’. Anos hunto cu resto di mundo ta e pobernan di mente cu semper a kere cu un refineria ta algo cu bo ta desmantela, pero awor nos a haya di tende cu bo por haci algo hopi mas conveniente cune. ‘Mas vale tarde que nunca’ cu e sabiduria aki a yega na nos porta, a traves di un promotor di musica… E anuncio aki ta laga nos cu e siguiente pregunta si: pakico no ta bay di biaha pa e cos den cual por converti e refineria aki 20 aña; esey no ta mas conveniente? Tempo cu gobierno anterior a bin cu un plan pa converti e refineria den un planta di mehoracion di crudo, sikiera nos por a discuti tocante algo cu tabata tecnicamente factible, aunke a keda duda riba cierto otro aspecto. Pero den e caso actual e aspecto milagroso aki so caba ta trece duda serio den intencion di e iniciativa aki. Y mas ainda ora scucha cu cierto asombro e ponencia cu ta bay introduci tambe un ‘catcracker’ cu ta trece atrobe e posibilidad di produci gasolin na nos isla. Na inicio di decada di 80. Exxon a dicidi caba di no renoba su cracker pa via di e situacion di mercado satura den nos region. Igualmente despues Coastal tampoco kier a haci esey, pa e mesun motibo. E mercado ta mesun satura, pero ta bay hinca placa den un nobo? Corsou ta e ultimo refineria den region pa inverti den un cracker nobo apenas algun aña pasa…Unda nan ta awe?

Si di berdad a logra haya banco pa hinca 3,5 biyon dollar den e aventura aki, laga nan gasta e placa no mas. Ta basta empleo nos ta haya pa un par di aña, cu nos mester. Pero prepara pa e fracaso cu ta sigui despues.

LJMADURO – 22-JAN-2021