Hello mi hendenan! Boso homegirl ta oficialmente un autor. Diabierna dia 24 di november cu yen ansha mi a bay post busca e cahanan di mi bukinan. Un collection di poesia titula “Cold Coffee” ta publica bou mi nomber. Orguyoso y contento mi ta warda mi fiesta diahuebs binidero. Pero bon ban papia!
Mi no kier papia mucho tocante mi bida personal, mi ta sinti manera cu e columna aki ta mas tanto destina pa critica social cu pa cualkier otro cos. Ainda mi ta sinti manera cu mi tuma espacio cu no ta dimi ora mi ta “make it all about me”. Pero miso ta pensa, mi bida ta mi prototipo. E manera den cual mi ta wak cosnan, ta un causa directo di mi experiencianan. Pues no tin manera di separa e columna di mi bida personal pasobra e columna ta depende di mi pensamentonan pa e por haya bida. Awo, si mi hinca experiencianan di mi bida den un contexto mas amplio e ora e ta bira un storia cu mas hende por beneficia di dje.
Lagami conta boso algo, probechando di e euforia di tin mi prome buki den mi man. Tempo mi a cuminsa skirbi hopi hende tabata harimi. Muchanan den klas na MAVO tabata ter mi pisa. Pasobra mi tabata skirbi y hopi biaha sinti berguensa di esey mi a bira un easy target pa hende tenta. Den un manera, mino tabata comprende con pa “own” mi talento y mientras tur e mucha muhenan den klas tabata explora make up y mucha homber, ami tabata prefera lesa of skirbi poesia. Mi meneer di scheikunde tabata ansha cumi pasobra den les mino tabata pone atencion na dje. E tabata skirbi den klassenboek “Tja, Yakari doet niks in mijn les, ze zit gewoon haar poezie carriere te ontplooien”. Djei, mi gana e prome competencia di Arte di Palabra na Aruba, mas despues mi tabata skirbi speech pa muchanan cu tabata bay pa reina na scol. Hustle gewoon riba school plein. Pero con cu bay bin, nada no tabata parce di duna “validez” na locual mi tabata haci. E tabata keda algo stranjo, acompanja cu echo cu mi tabata tin basta sobrepeso den mi tiener jaren y mi no tabata necesariamente atractivo tampoco. Pues e tabata mas facil ainda pa tentami. E stereotipo di “fat sad girl that writes poetry” tabata fit mi bon. Mas hende tabata tentami mas contexto mi tabata tin pa skirbi.
Mi mama a cuminsa bisa hende cu mi ta skirbi. Djei e tabata bin cas bisami “Yakari, la gente me dice que los escritores se mueren de hambre”. Despues cu mi a gana Arte di Palabra cu 15 anja, mi a manera cay den un “dip” y pa algun anja mino a presenta niun caminda. Mientras cu e otro hobennan a bolbe e competencia anja tras di anja, ami nunca a bolbe a bek. Aunke nunca mi a stop di skirbi si, mi tabata pasa hopi tempo den mi camber sera. Online mi a haya un comunidad di poesia cu pa tempo largo a bira un refugio. Niun hende tabata comprende dicon mi tabata pasa tanto ora dilanti computer. Pakico mino por a ta un teenager normal y mustra interes den bati caya y date. Pero den e comunidad online ey mi a haya mi stem.
Nos tabata tene diferencia competencia online. Ehercicionan manera “skirbi un poema desde tal punto di bista”, “skirbi un poema basa riba titulo di un cancion” y mas cosnan por el estilo nos tabata poetanan di tur rasa di tur parti di mundo, di tur edad. Mirando bek, tur esey a haci dimi, den mi perspectiva anto, un miho escritora.
Moral di e storia ta cu bo tin cu sigui bo sonjonan te hasta ora hende no ta comprendanan.
Bo vision ta di bo, bo talento ta di bo. Pa cliche cu e por zona. Esunnan cu ta hari bo, purba di menosprecia bo na final ta hacibo mas fuerte. Niun hende tabata tin mucho expectativa dimi mi hendenan, pero nunca mi stop di haci locual mi tabata stima. Mi ta consehabo, haci mesun cos. Awe mi a dunabo mi ehempel, mayan abo por duna un otro hende esun dibo.
