Vitaminaa B6 ta un di e ocho vitaminaa B, y ta esencial pa bo metabolismo, salud cardiovascular, y hopi mas. Pero pasobra nan ta disolve den awa y no vet, regularmente ta saca esaki door di e curpa, y pues mester wordo consumi diariamente.

Aki ocho beneficio di vitaminaa B6, y con pa haya suficiente den bo dieta.

1. Vitaminaa B6 ta yuda converti cuminda den energia
 Hunto cu otro vitaminaa B, B6 ta asisti e curpa den converti cuminda den energia. E ta yuda metabolisa carbohidrato y ta traha cu enzym pa kibra proteina den aminoacido – componentenan cu ta yuda e curpa crece y funciona adecuadamente.

2. Vitamina B6 ta sostene salud di curason
 “Vitaminaa B6 ta traha cu otro dos vitaminaa B – B12 y acido folico – pa reduci nivelnan di homocysteine”, segun Megan Wong, un dietista registra na AlgaeCal, un compania di suplemento di calcium.

Hyperhomocysteinemia ta sucede ora tin nivelnan halto di e aminoacido homocysteine den sanger. Cantidad halto di homocysteine por conduci na un aumento den riesgo di malesa cardiovascular, atake cardiaco, atake celebral y atherosclerosis, un malesa cu ta causa cu placa ta acumula den arteria.

Segun un reporte na 2015 publica den Nutrition Journal, hyperhomocysteinemia por sucede ora un persona ta deficiente den vitaminaa B6. Pero, cu nivelnan corecto di B6 den combinacion cu B12 y acido folico (B9), por reduci nivelnan di homocysteine te cu un tercer parti. Ta importante pa nota cu a pesar di nivelnan reduci di homocysteine, pashentnan no ta mira un efecto riba resultadonan vascular. Pues, vitaminaa B por tin un rol mas preventivo den salud di curason.

3. Vitamina B6 ta promove funcion celebral saludabel
 Un aumento den nivelnan di homocysteine tambe por agilisa decaida cognitivo, segun Wong. E aumento aki por conduci na aumento di riesgo di condicionnan neurologico manera demencia. Ademas di regula nivelnan di homocysteina, B6 ta hunga un rol den sintesis di neurotransmisornan importante – mensaheronan kimico usa pa e cerebro y sistema nervioso. Algun di e neurotransmisornan cu B6 ta yuda sintetisa ta inclui:

Dopamine: responsabel pa busca recompensa, motivacion, y movemento
Serotonin: ta stabilisa humor, causa sentimentonan di bienestar y alegria
Melatonin: ta hunga un rol den regula ritmo circadian y habilidad pa drumi
Noradrenaline: ta produci e respuesta ‘fight or flight’ (huy of bringa) den nos curpa na momento cu ta percibi peliger.

4. Vitamina B6 por yuda cu nausea mainta
 Durante embaraso, cualkier persona experimentando nausea mainta (morning sickness) usualmente ta ricibi un prescripcion di un pildo combina di doxylamine – un antihistamine – y vitamina B6.

A demostra cu vitamina B6 ta yuda cu nausea, mientras doxylamine por reduci sacamento. Un dosis tipico di e pildo di combinacion ta 10mg te 25mg, tres biaha pa dia.

5. Vitamina B6 por trata convulsion den baby recien naci
 Muchanan diagnostica cu Epilepsia dependiente di pyridoxine (pyridoxine-dependent epilepsy, PDE) ta rekeri entre 15 te 500mg di vitamina B6 pa dia pa bida largo. PDE ta un condicion genetico poco comun, cu ta aparece algun luna despues di nacemento y ta caracterisa pa convulsionnan dificil pa controla. Pero vitamina B6 por yuda controla e condicion.

Epilepsia dependiente di pyridoxine ta poco comun, cu apenas 200 caso reporta. E ta causa pa un mutacion di e gen ALDH7A1.

Ora ta trat’e via IV cu 50-100mg di vitamina B6 – tambe conoci como pyridoxine – e convulsionnan a desaparece den algun minuut. Muchanan diagnostica cu PDE ta ricibi 15 pa 30mg di vitamina B6 pa dia pa bida largo, pero por rekeri te cu 500mg.

Un persona cu ta sufri di e convulsionnan aki ta dependiente riba vitamina B6, rekeriendo e nutriente pa control a e condicion ya cu anticonvulsivo tradicional no ta traha.

6. Vitamina B6 ta reforsa un sistema immuun saludabel
 Curpa ta rekeri vitamina B6 pa mantene un sistema immuun saludabel. “B6 ta mehora comunicacion di celnan ‘mensahero’ yama chemokines, cu ta dirigi celnan blanco di sanger (white bloodcells) na areanan di infeccion of daño”, segun Wong. “Si no tin suficiente vitamina B6, por reduci e crecemento y produccion di actornan clave den sistema immuun: lymphocytes y anticuerponan.”

Tin dos forma di lymphocytes, ambos cu ta altera pa deficiencia B6:
T-celnan cu ta bringa invadornan stranhero den e curpa
B-celnan cu ta crea anticuerponan cu despues ta mara na invasornan stranhero, manera bacteria of virus y ta destrui nan.

Un estudio di 2006 publica den Journal Europeo di Nutricion Clinico a haya cu vitamina B6 a mehora repuesta immuun den pashentnan criticamente malo. E estudio a dividi 51 participante den tres grupo: un a ricibi un inyeccion di 50mg di B6 pa dia, otro 100mg, y un grupo di control (cu no ta ricibi nada). Despues di 14 dia di suplementacion, esunnan cu a ricibi 50-100mg di B6 a mira un mehoracion di marker importante den respuesta immuun, manera e conteo total di T-cel.

7. Vitamina B6 ta yuda preveni anemia
 “Vitamina B6 ta involucra den produccion di hemoglobin – un proteina cu ta provee e celnan cu oxigeno”, segun Lina Velokova, MD, PhD, un inmunologo clinico y consehero medico na Supplements101.

Nivelnan di hemoglobin mas abao cu normal ta un di e causanan di anemia, un condicion caracterisa pa nivelnan abao di celnan cora di sanger (red blood cells). Celnan cora ta transporta oxigeno a traves di e curpa, pues sin celnan cora adecua, por sinti cansa y fatiga.
Mantene un consumo adecua di vitamina B6 por yuda preveni anemia.

Con hopi vitamina B6 mi mester?
 E cantidad di B6 cu bo mester consumi diariamente ta depende riba edad y genero. Pa cada demografico, e cantidad recomenda diario di vitamina B6 ta segun e tabel adhunto.

Unda por haya vitamina B6?
 Vitamina B6 ta disponibel facilmente den cuminda y suplemento. “E miho manera pa sigura cu nos consumi suficiente di e vitamina aki ta a traves di un dieta rico den B6”, segun Velikova.
Cuminda rico den B6 ta inclui den e potret adhunto.

Si un persona no ta capaz di consumi suficiente vitamina B6 den su dieta, nan por considera bebe suplementonan B6. Velokova ta bisa cu dosis no mester ecxcede 1.4mg pa dia pa muhenan mayor di 18 aña, y 1.7mg pa dia pa hombernan mayor di 18 aña.

Wong ta recomenda suplementonan pa adultonan mayor, specialmente si nan tin reduccion den apetito cu por nifica cu nan no ta come suficiente cuminda rico den B6.

Papia cu bo dokter prome cu bebe cualkier suplemento, ya cu dokter por yuda determina e dosis corecto.

Pa conclui, vitamina B6 ta crucial pa mantene funcionnan adecua di e curpa. Su beneficionan ta inclui mehoracion di salud cardiaco y reforsa un sistema immuun saludabel.