33 aña pasa un grupo di ingenieronan a bini hunto cu un vision pa organisa ingenieronan cu diferente disciplina pa asina forma un plataforma, permitiendo interaccion intelectual, ganashi di conocemento y naturalmente forma un red, segun un comunicado di SIA. Sociedad di Ingenieronan di Aruba (SIA) a nace y añanan a pasa cu e sociedad a destaca su mes pero tambe cu momentonan menos bon.

Awor na 2017 e vision no a cambia tanto, al contrario esaki a bira mas profundo cu mas ingenieronan, y otro profesionalnan, cu a establece ariba e isla aki, segun SIA. Pa vocifera nan opinion base di nan profesionalidad tocante proyectonan, financia cu fondonan di e comunidad of proyectonan cu ta cambia e caracter di Aruba diferente manera.

E Sociedad di Ingenieronan di Aruba kier mas diversidad y ta yama un bon bini na otro profesionalnan cu por lo menos un grado di bachelor y un experiencia technical, entre otro den arkitectura etc. pa forma parti di e sociedad.

“Loke cu ta haci e sociedad interesante ta su lasonan cu organisacionnan di ingenieronan y profesionalnan den exterior manera Koninklijk Instituut van Ingenieurs (KIVI) na Hulanda y Union Panamericano de Organisaciones de ingenieria (UPADI).”

Cu un bista pa futuro studiantenan cu ta studiando pa un grado di bachelor of mas local of den exterior tambe ta bon bini pa uni.

Exploracion y produccion di petroleo y gas rond di Aruba: e riesgonan?
Awe SIA ta organisa un evenemento tocante exploracion y produccion di petroleo y gas rond di Aruba y su riesgonan. Theo Bergers, awor consehero di Oranje Nassau Energie y cu tabata Managing Director di Cirrus Energy, operadornan di gas na Hulanda lo presenta con pa explora y produci petroleo y gas (E&P) en general y e riesgonan confronta.

Leopoldo Henriquez lo splica e principionan cu ta mara den e ley di Comunidad Europeo 2013/30EU (publica despues di Macondo) pa preveni desasternan grandi cu por pasa durante e actividadnan di E&P. Sr. Henriquez tabata un Hoofdinspecteur trahando na e servicio ‘Staatstoezicht op de Mjinen’ cu ta encarga cu supervision di cumplimento di ley di minas Hulandes door di e operadornan cu E&P actividadnan na Hulanda y ariba lama cu ta pertenece na Hulanda (ariba Mar Norte).

E evenemento aki ta tuma luga na Universidad di Aruba di 7 pa 9 di anochi. Profesionalnan cu un grado di Bachelor of Science of mas ta cordialmente invita pa ta presente.

Tambe lo trata e siguiente preguntanan, manera

  • REPSOL a haya petroleo of gas caba?
  • Kende ta doño di e petroleo of gas rond di Aruba? Hulanda of Aruba?
  • Kico e instalacionnan cu facilidad pa bora hancra pa zuid di Aruba ta haci?

Historia
Na augustus 2017 e Ministro di Energia ta anuncia cu REPSOL y su partner TOTAL a bay bora pa petroleo y gas den cuatro area 15 kilometer den lama pa nord di Aruba. Segun e Ministro gobierno di Aruba a scoge REPSOL pa motibo di nan porcentahe di succes y pa motibo cu nan ta uza tecnologia superior.

Actividadnan di E&P semper ta contene peligronan grandi manera a experiencia na april 2010 cu e desaster di e plataforma ‘Deep Horizon’ cu tabata borando e pos Macondo den Golfo di Mexico pa British Petroleum (BP). A consecuencia cu 11 hende a muri, miyones di bari di zeta drama den lama y tambe e perdida di e plataforma Deep Horizon. Mundialmente esaki a causa atrobe un shock den e industria di E&P y entre e gobiernonan encarga cu e supervision di cumplimento di ley.

Atrobe pasobra esaki tambe a pasa na 1988 ora cu e plataforma di produccion ‘Piper Alpha’ a explota causando 167 morto y e plataforma destrui. Entre tanto diferente otro desasternan a pasa mundialmente, manera esun di Texas Refinery tambe di BP na 2005.

Ni maske cuanto superioridad un compania por tin semper tin e probabilidad cu un accidente grandi por pasa y esaki no ta un excepcion pa cu e actividadnan rond di Aruba. Ningun compania por duna un garantia di 100% cu nada no por pasa. Pero mester siña si for di e desasternan pa haya sa kico a causanan pa asina por tuma e medidanan necesario pa preveni esakinan of minimalisa nan. Implementacion di sistemanan pa manehanan adecuadamente por yuda preveni e desasternan aki.

E directiva
E directiva nobo di SIA ta consisti di un grupo di ingenieronan cu a acepta e reto pa hiba e plataforma aki den futuro

Presidente – Francisco de Mey un ingeniero electrico y tecnologia di energia y tambe cu tabata presidente di SIA den pasado

Secretario – Leopoldo Henriquez un ingeniero kimico

Tesorero – Maria Louwé un ingeniero electronico maritime (Radio-officer) y electronico, tambe president di SIA den pasado

Commisario pa actividadnan – Martin Richardson un professional den biokimica

Commissario – John Peterson un ingeniero den telecomunicacion

Commissario – Juan de Cuba, un ingeniero civil

Commissario – Kevin de Cuba un ingeniero den medio ambiente y desaroyo duradero


Con pa bira miembro di SIA
SIA ta habri pa profesionalnan y ingenieronan.

Kende ta cualifica pa bira miembro?

  • Ingenieronan y profesionalnan cu un grado den ingenieria (Ing, Ir, BSc, MSc)
  • Profesionalnan den arkitectura (BSc, MSc)
  • Profesionalnan cu un orientacion technico (HBO, WO)

Profesionalnan ariba otro tereno, kende kier uni, por tuma contacto cu e directiva pa mas informacion y consideracion.

Studiantenan den nan delaster 2 aña di studio na nivel HBO- of WO, tambe ta cualifica pa e miembresia pa studiante.

Durante evenementonan habri pa publico, tin posibilidad pa aplica pa miembresia.