Diaranson anochi, Sociedad di Ingeniero di Aruba (SIA) a organisa e prome actividad tocante boramento di gas y petroleo rond di Aruba y riesgonan cu esaki lo por trece cu ne.

E meta tras di e presentacion aki tabata pa alerta nos autoridadnan competente y henter comunidad riba e riesgonan cu mester tene cuenta den e fase cu lo tuma luga di parti di e boramento di Repsol. E compania Spaño aki ta bin realisando trabou di exploracion y eventualmente lo cuminsa cu boramento den nos awa teritorial pa explotacion di recurso di energia, ya sea gas of/y crudo.


Habri wowo
Presidente di SIA, Francisco de Mey a bisa e compania Repsol ta bay haci preparacion den nos awanan teritorial. Aunke nos por tin proceduranan riba e asunto aki, nos mester tin como pais e conocemento y e hendenan corecto pa controla nan. “E ta decisionnan cu ta wordo tuma cu no ta semper ta segun e proceduranan. Pero pa motibo di e costo, esey ta loke semper por ocasiona e tipo di desgracia”, el a bisa.

Dos orador, Theo Bergens y Leopoldo Henriquez a duna e charla aki. E prome ta un experto riba asunto di boramento di petroleo cu un trayectorio amplio na Europa y Medio Oriente. Mientras cu sr. Henriquez ta un persona cu experiencia riba asunto di regulacion pa preveni accidente den e proceso di explotacion y produccion di gas y petroleo.

El a trece como ehempel e desaster di e plataforma petrolero Deepwater Horizon cu a tuma luga na aña 2010 den golfo di Mexico. Esaki a explota ora e compania Britanico BP tabata den e trabou di explotacion di e pos di petroleo submarino Macondo. E tabata un desaster medio ambiental grandi, unda mas cu 3 miyon bari di crudo a basha den lama.

Den e caso aki e procedura tabata funcionando. Sinembargo ora e accidente a sosode dentro di tres ora a sali un documento riba e website di e comision di oil spill na Merca cu a indica cu e plataforma tabata safe, loke no tabata cuadra cu e realidad. E motibo tras di esaki tabata placa of consecuencia economico. Sr. de Mey ta haya cu influencia di placa ta un factor hopi peligroso.

Tocante e charla di diaranson ultimo, SIA ta spera di por a habri wowo riba asunto di boramento di gas y petroleo rond di Aruba, y riesgonan cu esaki lo por trece cu ne. Ya cu boramento ta bay tuma luga, pero na e momento aki nos no sa si nan ta bay haya algo of kico nan ta bay haya. Ademas no mester descarta cu durante e proceso aki nan por haya presencia di crudo den lama y no di un meter cubico, sino cu basta bari por sali dependiendo di e presion.

P’esey ta importante pa nos ta prepara pa cualkier eventualidad den caso cu algo por bay robes. “Bo no kier esey, pero e por pasa”, el a bisa. E ta haya cu nos por tin tur procedura implementa, ‘pero e mentalidad semper ta e problema den e asunto aki’.

E ta haya cu actualmente pa tur cos tin procedura, pero manera a sosode cu e pos di petroleo submarino Macondo, pa motibo di tempo, placa entre otro,y falta di investigacion, a sosode e desgracia aki y nan consecuencianan. E tabata e oil spill mas pio den historia. “Boramento no ta un rato bo ta hacie. Bo mester ta hopi cauteloso y hopi bon al tanto kico por faya”.

P’esey SIA a bin cu e iniciativa di organisa e charla aki pa informa nos comunidad. “Mi ta spera cu e hendenan por cuminsa pensa, pasobra tin peligernan indirectamente”.

Naturalmente e ta haya cu mester sali for di punto di bista cu gobierno tambe ta informa di e riesgonan aki. Pero SIP como un asociacion di ingenieronan y profesionalnan, nan lo bay trece nan puntonan dilanti publicamente pa loke ta proyectonan. No solamente proyectonan cu tin di haber cu placa di comunidad. Pero tambe proyectonan cu por cambia nos pais den cierto manera, sr. de Mey a declara.

SIA
Basta tempo pasa, SIA tabata organisa charlanan, pero awor e asociacion kier bay mas afo y ta mas activo. E aña venidero nan tin plania pa bin cu alrededor di ocho charla caba. P’esey nan a bin cu e charla aki cu a tuma luga na Universidad di Aruba y cu a conta cu presencia di hopi publico. Algun di nan envolvi den e tereno di energia, medio ambiente, entre otronan. Sr. de Mey a indica cu e presencia di hopi publico ta debi cu e asunto di boramento di gas y petroleo rond di Aruba ta bay bira actual.

SIA ta un organisacion cu un trayectorio di 33 aña di existencia. Sr. de Mey kende a caba di asumi e presidencia di SIA pa un aña, a informa cu nan a cambia e esencia di e organisacion cu inicialmente tabata pa profesional riba tereno di ingenieria. Awendia e asociacion ta mas habri pa arkitectonan y otro tipo di profesionalnan. Esunnan interesa por acerca SIA pa nan tuma den consideracion nan miembresia. El a laga sa cu studiantenan por bira miembro tambe.