Departamento di Impuesto Aruba (SIA) a cuminsa entrega pa fase, e plachi di impuesto di vehiculo di motor. Vocero di SIA, Meverly Romano tabata un poco reserva di duna mas informacion con e proceso di entrega di plachinan lo sigui implementa, specialmente pa esunnan di e categoria A di vehiculo priva.
El a prefera di duna mas detaye pronto. Sinembargo Romano a revela cu SIA ta cla pa implementa e fase dos, ya cu nan ta finalisa e prome fase. E fase aki tin di haci cu e vehiculonan plachinan na e companianan priva, departamentonan di gobierno, fundacionnan y otro instancianan.
Nan tin pensa di cuminsa e fase dos pronto, pero esaki ta depende di e situacion actual di e coronavirus/Covid-19. E fase dos ta encera un compania di entrega cu ta bay yuda e cliente cu ta desea di haci uzo di nan servicio.
Romano a aclaria y enfatisa cu e uzo di e servicio di entrega no ta uno obligatorio. “E ta solamente si esnan cu ta desea di laga un compania di delivery pa busca nan plachi y entreg’e na nan,” el a bisa na Bon Dia Aruba.
Aworaki SIA ta bay cuminsa traha cu e companianan di delivery. “E ta un opcion pa nan cliente y no un obligacion,” Romano a declara. E persona cu no ta desea di haci uzo di e servicio ey por warda pa fase tres.
Aunke Romano no a duna detaye kico e fase tres ta encera, nos por deduci cu esaki ta encera e posibilidad pa e cliente mes bay busca su plachi di number di auto, cumpliendo cu cierto protocol stricto di higiena y bio siguridad exigi pa DVG y asina evita cualkier contacto of transmision di e virus. Seguramente esaki lo sosode ora cu ta wordo flexibilisa totalmente e medidanan introduci di shelter in place.
