Awe e oficina principal di Servicio di Impuesto Aruba (SIA) na Camacuri ta habri bek, despues di permanece full e siman pasa cera, pa motibo di construccion.

Ainda ta hopi e clientenan di SIA cu no a paga nan numbernan di auto y otro compromisonan fiscal; y e apertura di e oficina cu ta esun cu su servicio di caha ta atende mas publico, lo facilita e fluho di clientenan cu ainda ta pendiente pa realisa nan pago. PR di SIA, Mervelyn Romano a indica na Bon Dia Aruba cu na momento cu un persona tin un vehiculo di motor, e tin un responsabilidad cu ne. E tin cu cumpli entre otro cu e auto ta den bon condicion tecnicamente, seguro valido y pago di belasting di su number.

Si un cliente no tin e medio financiero pa den januari e paga su belasting e miho recomendacion ta pa e cliente haci un planeamento pa su mes, ya sea reservando cierto suma durante e aña. Ya caba for di december ora cu e posibilidad di pago ta habri, e cliente por haci por lo menos e pago di mita aña di su belasting. “Nunca e ta bay hay’e den un problema asina. E ta un disciplina tambe di e cliente.”

Kehonan y servicio
Despues di e periodo druk aki, SIA ta den evaluacion pa habri den nan postnan di pago un cahero pa e clientenan haci otro pagonan cu no tin di haber directamente cu pago di number di auto. Nan lo reuni internamente pa wak cual ta e miho manera pa atende cu e situacion. “Nos ta considera tur e criticanan cu nos ta haya si.” Tambe nan ta puntra nan caheronan cual ta e sorto di criticanan cu mas nan ta ricibi di nan clientenan. A pesar di e kehonan, e ta haya cu e kehonan aki ta un indicacion di bo servicio y nan tin cu tuma na serio. Nan mester tene cuenta cu e otro clientenan y duna preferencia ya cu pa ehempel si nan no paga loonbelasting y/of Bbo dia 15 di cada luna nan ta bay haya un boet. “Nos kier cumpli cu nan  tambe”, el a bisa. E ta reconoce cu tur cos ta un proceso pero cu nan ta bayendo den bon direccion pa duna miho servicio.

E ta haya cu e proceso di pago di number di auto no ta uno hopi largo. Pero loke ta pega e fluho di cliente ta, cu un cliente ta bin paga varios number, ya sea cu nan ta bin paga pa nan famia tambe, y esaki ta tene e cahero hopi largo ocupa. Esaki ta algo cu nan ta bay evalua den futuro. Nan ta un departamento di gobierno cu tin hopi cliente y nan kier yega na un forma cu e fluho di hendenan por bay mas lihe di loke e ta actualmente.

Yenamento formulacion di impuesto
Sra. Romano a laga sa cu personal di SIA ta dunando yudansa pa e hendenan interesa pa yena ainda nan formulario di  declaracion di impuesto. Tin clientenan di nan cu ainda no a yega na e formulario aki, y nan por acudi libremente te awe na MFA-Paradera, sin mester di haci cita. Tur luna nan ta haci nan campaña di yenamento di formulario na diferente sitio e ultimo siman di fin di luna for di 8or di mainta te cu 12or di merdia; y despues for di 1:15pm te cu 4or atardi pa nan por cumpli cu e obligacion legal aki.  Pa e ultimo siman di maart nan tin plania pa bay WYCA na San Nicolas y fin di april nan lo ta na Biblioteca Nacional na Oranjestad. Na ultimo siman di Mei nan lo ta na SIA San Nicolas y na MFA Paradera y eventualmente na WYCA Dakota.

E servicio aki ta disponibel pa cualkier cliente di SIA cu no ta comerciante y cu no ta traha ariba su mes ya sea cu ta depende di un pensioen of di un salario como nan entrada.  E ta un servicio completamente gratis. “E clientenan cu ainda no a yena nan formulario; mi ta conseh’e pa nan pasa pa nos yud’e pa e por cumpli cu nan obligacion”, segun e vocero.

Despues di e prolongacion di seis luna, e ultimo fecha pa entrega e formulario ta 1 di juni venidero; y pa nan por yuda e clientenan mas tanto posibel nan ta organisando e campaña  di asistencia pa yenamento di formulario tur fin di luna.