Den nomber di empleadonan di Bureau Centro Multidisciplinario (MdC), sindicato SEPPA pa medio di su Secretaria General, Magaly Brito ta reacciona riba cierto ponencia cu recientemente Minister di Enseñansa, Ciencia y Desaroyo Sostenibel, dr. Rudy Lampe a trece dilanti riba e servicio cu MdC ta brinda pa nos comunidad.

E empleadonan di Bureau Centro Multidisciplinario (MdC) cu ta afilia na SEPPA, kier vocifera nan inkietud tocante cierto informacion cu Lampe a trece dilanti. Lampe a trece dilanti cu mayornan a acerca su persona pa conta cu nan yiunan ta warda dos aña pa wordo getest na MdC. Lampe a compara esaki cu Boneiro, y a expresa lo siguiente: “e Expertisecentrum cu tin eynan, mester traha un rapport dentro di 6 siman. Y si dentro di 6 siman e no ta cla, e tin cu busca experticio di afo, pasobra tin maximo 3 luna pa cumpli. Akinan tin biaha e ta bay te 3 aña, segun e resultadonan di e prome investigacion cu nos a haci.”

Aki, e empleadonan di MdC cu ta afilia na SEPPA ta haya importante pa trece aclaracion ariba e ponencia cu Lampe a trece dilanti. Desde cu e.o. Departamento di Enseñansa mes a dicidi pa e centro bira un dienst riba su mes na 2011, tabatin un lista di espera (wachtlijst) basta largo existente cu e departamento a hereda. Un di e metanan primordial tabata pa organisa y reforsa e departamento miho, pa asina por duna un miho servicio na e clientenan, cu ta e muchanan.

Durante e añanan cu a transcuri a haci hopi esfuerso pa fortalece y structura e departamento, di manera cu e tempo di espera a baha for di mas cu 2 aña, y a bira un tempo di espera di mas o menos 9 luna. Sinembargo, e departamento ta consciente cu e reto a keda pa por haya mas personal den dienst, y pa asina por sigui haci e tempo di espera uno mas corto.

En berdad ta bon pa por compara e personal di MdC cu esun di e centro di experticio di Boneiro, EOZ, pa asina por wak dicon tin un diferencia den e tempo di espera (wachtlijst):

Na Aruba tin 68 scol cu MdC ta atende, na Boneiro tin 7 scol cu e centro di Boneiro ta atende.

Na Aruba tin 11,405 alumno, na Boneiro tin 1,778 alumno.

Na Aruba MdC tin 6 psicologo pa atende tur caso, na Boneiro tin 10 psicologo pa atende caso y na Boneiro ta paga pa psicologo priva pa por atende casonan tambe, pa asina evita un lista di espera largo.

Tin pues un diferencia grandi entre e centro di Boneiro y MdC. No por compara e dos situacionnan aki, mirando cantidad di personal y alumno cu ta atende. Di parti di e team di MdC tin comprension pa e retonan cu gobierno tin na e momentonan aki pa cu e presupuesto. Y alabes e team di MdC ta consciente cu si uza e normanan di e situacion na Boneiro, MdC lo mester tin 25 psicologo, cu lo ta un reto na e momento aki, mirando e situacion financiero di nos pais.

Proposicion

E team di MdC cu ta afilia na SEPPA ta contento di scucha for di Lampe cu e ta dispuesto pa coopera cu profesionalnan encuanto e wachtlijst. Tambe nan ta desea pa traha hunto cu Lampe pa mas lihe posibel trece un ayudo na nos muchanan di Aruba. Pa logra esaki ta trece algun opcion padilanti:

A corto plaso, trece bek e personal cu ultimo tempo a bay ter beschikking otro caminda. Ta trata di mas o menos 4 persona, cu sigur lo por aporta na distribui e lista di espera.

Si e prome punto no ta posibel, nan ta sugeri pa ehecuta un overplaatsing di e personanan ariba menciona pa por reemplasa nan a corto plaso, door di adkiri personal via un procedura pa yena e vacaturanan aki. Esaki no lo tin efecto ariba e presupuesto.

Mocion pa fortifica MdC

Pa solucion a largo plaso nan ta referi na mocion number 34 di dia 20 di april 2018, cu a pasa unanimamente den Parlamento di Aruba, pa hustamente fortifica e centro Multidisciplinario den su forma actual, pa asina e por brinda e servicio cu su clientenan ta merece, cu na su turno tambe ta yuda tur otro mucha, nos educadornan y scolnan grandemente.

Finalmente, nan kier a remarca cu e personal di MdC cu ta afilia na SEPPA, a keda sorprendi cu e declaracion di Lampe unda ta bisa ‘cu hues a duna minister di Enseñansa tin 3 luna pa dicidi riba loke ta e futuro di e direccion di e centro’. E personal di MdC cu ta afilia na SEPPA no ta compronde e declaracion aki, como cu segun e personal a wordo informa, en berdad hues a duna minister 3 luna, pero esaki ta pa dicidi si ta firma of no ta firma e landsbesluit di e hoofd di Bureau Multidisciplinair Centrum, sra. dr. Rosanna van Dijk. Na ningun momento ta conoci cu ta tocante e direccion y futuro di e centro, mirando cu esaki no tin di haber cu e caso menciona.

Por ultimo, SEPPA kier comunica cu tin personal di MdC, cu ta afilia na SEPPA, cu pa basta tempo ta warda ariba nan landsbesluit, y keto bay ta den incertidumbre encuanto di nan posicion huridico.