Mañan scolnan ta cuminsa habri despues di dos luna cu muchanan a keda cas pa via di e crisis di COVID-19 cu a afecta henter mundo. Recientemente Bon Dia Aruba a manda un serie di pregunta na instancianan concerni, pa haya informacion concreto si nan por garantisa salud di docente y alumnonan pa evita propagacion di e virus.

A base di publicacionnan di World Health Organization (WHO) y Rijksinstituut voor Volksgezondheid en Milieu (RIVM) riba cual Aruba ta delinea su maneho di e pandemia di Covid-19, Bon Dia Aruba a puntra DVG y HAVA algun dia pasa si nan tin documento oficial cu cual nan por sostene loke a anuncia den un conferencia di prensa, unda nan a sigura cu e virus ta transmiti masha poco di mucha pa adulto y di mucha pa mucha.

Despues di cuatro intento haci via preguntanan di conferencia di prensa y e-mail manda pa por haya un contesta specifico riba un pregunta, Bon Dia Aruba no a haya documentonan oficial pa sostene e informacion cu nan a duna di conoce pa loke ta trata contagio di mucha pa adulto y mucha pa mucha. Den un conferencia di prensa Dr. van Trigt no a contesta e pregunta y a referi Bon Dia Aruba pa busca informacion riba e website di RIVM y WHO.

Finalmente, den un e-mail cu adi van Trigt, cu fecha 16 di mei 2020, el a indica: “E stelling NO por ta uno absoluto; e riesgo di traspaso di mucha pa mucha y mucha pa adulto ta chikito. Den e contactonderzoek ta mustra cu e bronpatient/infector casi semper ta un adulto”. Esaki ta confirma cu e declaracion aki ta basa riba su opinion personal y no riba investigacionnan cientifico concreto.

Den investigacion cu a wordo haci riba e dos websitenan menciona, no tin dato concreto pa sostene e declaracionnan di DVG y HAVA, unda bisa den conferencia di prensa, cu RIVM cu WHO ta señala cu e virus ta nobo ainda, awor Hulanda ta haciendo investigacionnan basa entre otro cos, riba e rol di e muchanan den plamamento di e virus.

E presentacion cu HAVA a duna den conferencia di prensa 12 di mei ultimo, ta datonan preliminar di RIVM pero no tin nada concreto te ainda y falta mas estudio pa haci, segun RIVM y WHO, pa por saca un conclusion definitivo di kico e rol di transmision di COVID-19 di mucha pa adulto y di mucha pa mucha ta.

Tambe Bon Dia Aruba a investiga riba e website di Centers for Disease Control and Prevention (CDC) di Merca, cu ta e pais mas afecta na nivel mundial,unda a saca un publicacion 15 di mei ultimo, pa loke ta trata cuido di mucha pa COVID-19. Ey ta bisa cu si mucha ta reuni den grupo, nan por pone tur hende den riesgo. Mayoria di mucha cu ta haya Covid-19 tin sintoma leve pero ainda nan por transmiti e virus pa otro personanan cu ta cay den grupo di riesgo, incluyendo adulto y personanan cu tin malesa cronico caba.

Ademas, Bon Dia Aruba a tuma contacto cu sindicato di maestro di Aruba (SIMAR) pa puntra nan posicion pa cu reapertura di scol y garantia di salud pa docente. Josephine Albertus, presidente di sindicato a contesta cu e decision aki mester wordo tuma di un manera responsabel:“Instancianan y gobierno kier habri scol sin pensa cu hopi maestro ta cay den grupo di riesgo y no sa kico por pasa cu nan”, ademas cu ora scol habri e mesun maestronan mester hiba nan propio hand sanitizer, pero como dunador di trabao nan mes mester ta consciente di e responsabilidad cu nan tin pa salud di nan trahador.

Tambe el a manifesta cu prome minister, Evelyn Wever Croes a enfatisa cu scolnan no mester habri dia 18 y 25 di mei, si nan no por garantisa bienestar y salud di mayor, docente y alumnonan, pero nan por habri te comienso di aña escolar y cu nan mester bin cu un plan. Tambe Albertus a comenta cu e mesun dia minister di Salud a informa cu scolnan mester habri den e dianan aki. “Akinan bo por wak cu nan ta contradeci nan mes”, Albertus a sigura.

Albertus a agrega tambe cu “ta hopi fastioso pa wak cu bienestar,salud y seguridad di un docente ta wordo poni un banda,” pa facilita algo encuanto un situacion social, sin cu ta pensa tambe si e manera cu nan kier drecha ta un manera responsabel.

Sindicato di maestro Simar a duna di conoce cu nan ta hopi preocupa pa e manera cu kier procede pa habri scolnan, tambe cu instancianan y gobierno no ta riba e mesun linea pa loke ta trata salud di docente y alumnonan.