Si pueblo no sa di tratado… Ta ken por yuda?

Hues di Prome Instancia a dicta sentencia den e caso entama pa varios ciudadano di nacionalidad Venezolano, cu no ta di acuerdo cu e proceder di gobierno den su maneho di e casonan di ciudadano Venezolano, cu ta haci uso di nan derecho pa pidi asilo. Hues no ta haya cu necesariamente gobierno mester tene nan cautivo, pero por laga nan den libertad, cu e obligacion di presenta periodicamente pa duna cuenta cu nan ta permanece aki. 

Tin algo straño den esey? Pa hopi di nos hendenan, sí. Nan tin e firme opinion cu tur hende cu yega na nos isla como persona indocumenta/ilegal, etc. mester keda cera te dia nan keda expulsa. Esaki ta e opinion cu nos por topa cu un frecuencia halto riba rednan social, unda por lo general no tin mucho aprecio pa e decisionnan di hues, cu ta confirma e imagen cu hopi hende tin di nan, cu nan lo ta anda ‘demasiado suave’ cu tur e personanan aki. Ta facil pa mantene un opinion asina, y no tuma na cuenta cu e aspectonan cu e hues mester considera ta hopi mas, y hopi mas complica tambe cu e pensamento simplista cu mester cera e hendenan ey sin mas, te ora saca nan. Claro cu mantene e tipo di pensamento aki no ta yuda pa nada pa comprende pakico e hues ta yega na otro decision, y cu esey ademas ta un decision bon tuma.

E realidad cu e personanan aki ta ignora, ta cu nos ta parti di un nacion cu ta considera tur tratado internacional cu tin y hasta ta reconoce y firma gran parti di nan. Nos como parti di e Reino ey, tin e oportunidad pa ratifica e tratado tambe, si nos ta considera cu e por ta util pa nos como pais. E tratado encuanto refugiado adopta pa Nacionnan Uni na 1951, ta defini ken por haya e status di refugiado y ken por lo tanto mester haya asilo di e pais unda el a haci un peticion pa tal. Tambe e ta defini ki derecho e persona cu ta busca asilo, cu e ta haya e status, si of no, mester haya. Y sin bay den hopi detaye di kico e derechonan ey ta, tin uno fundamental den henter e asunto: mester atende debidamente e peticion di un persona cu na entrada ta duna di conoce cu e ta considera su mes un refugiado y cu e ta desea di haci uso di e posibilidad di haci e peticion corespondiente. Esaki caba, nos ta ripara, tin hopi hende cu no ta comprende, o no kier comprende, cu esaki ta algo cu ta obliga gobierno di anda debidamente cu e asunto aki. No ta cuestion di ‘anda suave cu nan’, ta simplemente di haci lo corecto como gobierno di un pais civilisa y cu ta obedece na e exigencianan di e tratado cu a firma.

Pero, si tin asina un falta di comprension cerca nos hendenan, kico a bay malo anto? Ta ken a keda sin duna informacion concreto y al caso, no den e caso aki so, sino den varios otro, unda e conocimento di e tratadonan cu nos tin ratifica, ta minimo? Por ehemplo, te awe tin hopi hende cu ta kere cu un mucha cu ta ilegal na nos isla, no tin derecho di bay scol. Es mas, segun nos leynan e mester bay tambe, si e ta den e edad di enseñansa obligatorio. Nos ta haya señalnan cu den e sector aki no ta tur scol ta haci e mesun esfuerso pa cumpli cu nan parti di e tarea pa percura pa nos tin suficiente cupo pa mucha ilegal, y cu por lo tanto e tarea ta cay mas tanto pa e scolnan publico, cu no por nenga ningun mucha. Pakico nunca ta toca e tema ey?

E punto ta cu nos ta haya cu gobierno, o e ministronan concerni den cada caso, mester trata di haci un tarea miho y mas completo di informa comunidad di kico cierto tratado ta exigi di nos como pais. Mas tanto nos ta haya un splicacion cu casi ta duna e impresion cu ta lamenta cu nos tin e tratado ratifica… Como pais cu ta respeta su mes, y ainda nos ta kere cu nos por ta esey, mester bisa bon cla unda nos ta para y cu nos ta cumpli, cu orguyo. Sigur den e caso di cual nos ta papiando. Nunca antes e problema aki, e destruccion casi completo di un pais di 30 miyon hende, a surgi di e manera aki. Probablemente, y ban spera cu e ta asina, e lo no ripiti tampoco den e proximo siglonan. Si ta berdad cu nos tin entre 10 pa 15 mil Venezolano indocumenta na Aruba, nos comunidad a haci un tremendo trabao di absorbe nan, pasobra nan no ta drumi riba caya.

Y si proximamente nos cuminsa haya mas di e hendenan aki, ban simplemente atende e asunto, envez di cana lamenta. Si nos mester di un bon lugar pa hospeda esnan cu no tin lugar di keda, nos no por usa e mancamp na Sero Colorado pa esey? Citgo no ta cumpliendo cu nan pago; nos mester por negocia esaki…