E escandalo alrededor di retiro di e ministro encarga cu entre otro Infrastructura, envez di mengua, cada dia ta parce di ta bira mas grave. Despues di e sorpresivo anuncio siman pasa di presidente di parlamento cu e ta revoca e mocionnan supuestamente aproba den e tumultuoso reunion di 15 di october, cu a lanta un monton di pregunta si e ta autorisa pa tal, diabierna pasa e mesun presidente a ‘corona obra’ cu su carta den cual e ta admiti cu e manera cu e mes a laga aproba e polemico mocion di desconfianza, tabata ilegitimo y cu por lo tanto mester considera e mocionnan nulo y no valido.

Inmediatamente a cuminza e gritonan cu awor ta keda un opcion mas pa e presidente di parlamento cu a mustra tanto ineptitud y testarudez den su funcion, cu no ta keda nada otro opcion cu entrega su retiro. Mientras cu nos por ta di acuerdo, mirando e situacion di desastre cu el a laga atras, ta dificil pa pensa cu esey ta bay remedia algo. Lo ta hopi facil pa pone tur cos malo den e asunto aki riba tayo di e presidente, y de paso absolviendo tur e otronan cu a hunga un papel sumamente dudoso den e asunto di mal holor aki. No solamente cu tin otro responsablenan pa menciona, pero mas cu tur cos a sucede cos cu ta tira un mancha scur riba nos sistema democratico, y e daño ey no ta chikito. Ta importante analisa algun suceso cu a tuma lugar cu ta pone nos parlamento na nivel di basura, cosnan cu nunca mester a sucede. Nos ta bolbe un rato na e reunion di 15 di october.Den e segunda tanda ta bin un mocion di desconfianza cu, bon mira, e presidente no mester a permiti, sino cu mester a bay pa un otro reunion, unda mester a aparece como punto di agenda: maneho di e ministro en cuestion. Den e reunion ey, despues di dun’e su oportunidad pa defensa, por a vota di forma legitimo riba e tema aki. Permitiendo e reunion pa bay den e forma bergonzoso ey, e presidente a viola e normanan mas basico di decencia elemental, y ademas tabata contra reglanan basico di Constitucion. Nos ta comprende e motibo pa no a para e manera di proceder aki di un otro colega parlamentario, cu tambe aparentemente ta carece di e decencia elemental aki, pasobra e tabata un trampa prepara di antemano. Pa ilustra esey mester menciona cu e mocion di desconfianza tabatin 11 diferente punto den su considerando y tabata mustra manera algo demasiado elabora pa por a traha den pura e ora ey, mirando cu e ministro lo no a duna su cooperacion na implementacion di e maneho tolerante pa cu spearfishing. Nos a sigui e reunion integralmente como redaccion y ningun momento, segun nos opinion, e ministro no a bay mas leu cu haci advertencia cu ta duna señal cu e ta tuma su trabao na serio. A base di esey bo kier kita un ministro, que verguenza!

Despues cu henter e payasada aki a fracasa, y a bira bon cla cu e mocion lo no por ta base pa retira e ministro pa e entrega su retiro, a bin e siguiente maniobra y esey ta e retiro a base di e consenso den conseho di ministro cu nan no ta desea di traha mas cu e ministro en cuestion. Gobernador ta manda puntra den su carta na Staten pa un opinion di Staten tocante e intencion di retiro di conseho di ministro cu e tambe mester bay firma. E ta pidi textualmente pa un respuesta “op korte termijn”, na bon Papiamento ‘a corto plazo’. Di ningun manera Gobernador a pidi pa un respuesta ‘di inmediato’ desrespetando reglanan basico di yama reunion di Staten, unda lo tabatin un oportunidad pa e ministro defende su maneho. Pero a core tene un reunion den pura cu no a permiti tur miembro yega, un violacion riba su mes di e derecho di cualkier miembro pa conoce cu anticipacion e reunion, y no e payasada teni dentro di un ora aki. Ta keda naturalmente e predunta pakico Gobernador toch a firma sin averigua e proceso cu Staten a encamina pa yega na su recomendacion, sigur si ocho dia promer tabatin caba un proceso tur troci cu a haci cu e mocion di desconfianza di 15 di october tabata descarta caba pa e forma bochornoso den cual el a tuma lugar.

Per, manera nos tur sa, Gobernador no ta responsable pa su firma, y esun cu mester duna cuenta politicamente pa esey ta e ministro firmante, cu ta nos Promer Ministro. E preocupacion di tur ciudadano cu kier e pais aki bon mester ta cu e tipo di practica aki, cu nos a describi como practica di asaltante, no ta e rumbo cu e pais aki mester bay. Cu entre nos gobernantenan na e nivel mas halto ta birando normal cu ta actua asina, sin e minimo consideracion di respet pa reglanan cu cualkier club di deporte lo respeta mihor, ta alarmante, specialmente ora e ta bin di esnan cu continuamente ta usa e palabranan ‘bon gobernacion’. Nan tin mas trabao di haci cu nan ta kere. Baha un presidente incapacita ta lo minimo.

LJMADURO – 01-NOV-2020