Fundacion Lanta Papiamento ta señala cu e bataya pa tin enseñansa den Papiamento na Corsou y Aruba ta bay bek leu, cu iniciativanan clave di cierto personanan den catolicismo cu te hasta tabata percura por medio di nan propio imprenta pa tin material pa scol den Papiamento.

Relaciona cu e anuncio di minister di enseñansa, Rudy Lampe, su deseo pa ehecuta e proyecto di scol multilingual na Aruba, Fundacion Lanta Papiamento ta sigui duna un historia amplio riba e desaroyo di Papiamento, e biaha aki relaciona cu enseñansa y catolicismo. E fundacion pa algun tempo a lucha pa Papiamento sigui desaroya y ta laga na e minister pa encarga su mes cu desaroyo di scol multilingual.

Siguiendo ultimo biaha unda a amplia riba Papiamento su raiznan etnico, Joyce Pereira di e fundacion ta splica cu na momento cu Papiamento a drenta Aruba e tabata ya caba desaroya inmensamente despues di un periodo relativamente cortico na Corsou. Algo cu a yuda Papiamento desaroya ampliamente ta cu religion, specificamente catolicismo, a preocupa su mes ampliamente pa uza e lenga di pueblo. Esaki mas cu claro tabata Papiamento, mirando manera sra. Pereira a indica cu Hulandesnan no tabatin actitud di pasa nan idioma pa otro gruponan.

Na 1750 a habri porta di Aruba oficialmente, pero tabata laga solamente hende di Corsou establece aki. Un di e prome cartanan cu sra. Pereira a haya den Archivo Nacional (ANA) cu ta indica cu Papiamento tabata den uzo amplio, ta di 21 indjan di Aruba cu a skirbi un carta pa un señor Quant, kende segun nan, no tabata haci nan trabou bon, denunciando e contra nan dunado di trabou.

Ademas di esaki na Corsou catolicismo a preocupa su mes ampliamente pa Papiamento desaroya, y esaki ta claro si ta mira e practica di misionnan catolico pa semper uza e lenga local ora di plama nan predicashi y otro material religioso. Esaki ta refleha bek tambe den e manera con e mayoria di e prome material na Papiamento den siglo 18 y siglo 19 tabata material religioso.

“Hopi di e material tabatin hopi fout den nan, pero esey ta di compronde pasobra e frèrenan no tabata linguista, pero nan a purba nan best si.”

Scol catolico ‘a bolter’ ora a exigi Hulandes den enseñansa

Pero e desaroyo aki a mira un otro realidad cu a cambia drasticamente despues di tempo, ora den 1815 a forma Reino Hulandes. E tempo ey e prome rey a bisa cu Hulanda ta 1 Reino unda tin 1 pueblo y 1 idioma. Esaki nan a dicidi ora nan a mira cu Spaña a plama nan idioma rond mundo, mescos cu Francia y Inglatera. “Pero nan no tabata consciente cu Hulandes no a haya hopi adopcion pa via di nan propio actitud elitario.”

Despues di esaki varios decreto a cay unda ta purba curasha e idioma Hulandes bou pueblo por medio di diferente medida, cual tabata inclui un decreto na 1935 unda a specifica cu ta duna subsidio na enseñansa solamente si e unico idioma di instruccion ta Hulandes.

Tabatin varios scolnan cu prome cu esaki tabata desaroya nan propio material pa uzo cu enseñansa den Papiamento, specialmente na Corsou. Riba e aspecto aki segun sra. Pereira Aruba a keda poco atras, esta e desaroyo di enseñansa den Papiamento.

Esaki ta ilustra segun sra. Pereira cu e argumento cu cierto hende tin contra trece Papiamento den scolnan no ta algo cu ta basa den realidad. “Bo tin cu hinca Papiamento den scol y e ora ey bo ta mira cu e material ta bin. Si tanto aña pasa nan tabatin enseñansa den Papiamento y nan mes tabata traha nan material, dicon anos no?” Un di e frèrenan cu tabata inverti fuertemente na Corsou den enseñansa na Papiamento tabata sr. Putman cu te hasta tabatin su propio imprenta unda tabata imprimi buki pa su propio scolnan.

Un di e poco hendenan cu a preocupa su mes cu e desaroyo di Papiamento den enseñansa na Aruba, mirando cu aki no tabatin hopi esfuerso, tabata gobernador Nuyens. Segun sra. Pereira a bin ta haya sa, e gobernador den su tempo a bin Aruba y a nota cu enseñansa lo ta hopi mas eficiente den Papiamento. El a urgi pa nan bin cu esaki tambe.