Despues cu nan a bini cu un serie di denuncia verbalmente prome y despues di eleccion, fraccion di MEP ta haya cu e momento a yega pa haci e denuncia debidamente cerca e instancia competente.

Lider di fraccion di MEP, Rocco Tjon a anuncia cu e siman aki nan lo entrega un denuncia formal dilanti Ministerio Publico (OM) pa start un investigacion oficial. El a aclaria cu esaki no tin di haber cu politica, sino cu e ta forma parti di nan trabou como parlamentario.

E no a referi na niun caso specificamente. Mas bien e parlamentario a prefera di abstene ya cu si nan ta duna detayenan, eventualmente esaki lo por ‘susha e investigacion’. E ta considera cu OM mester haya e chens di haci nan investigacion mas miho posibel pa asina nan por trece e berdad padilanti.

Unabes cu nan lo entrega e rapport na OM, fraccion di MEP lo keda monitor cada dos siman e desaroyo di nan investigacion. Esaki den caso cu OM ta start e investigacion. Si den caso cu OM no ta start e investigacion, nan lo desea di scucha e motibo. Si esaki no ta cay na nan agrado, e fraccion aki lo apela esaki. Te hasta nan lo por contempla un encuesta parlamentario.

Segun lider di fraccion di MEP, nan a haci nan tarea y e siman aki nan lo entrega e prome rapport na OM pa start un investigacion. El a bisa cu nan a tarda pa entrega e denuncia aki ya cu nan kier pa e ‘berdad bin padilanti’. Parlamentario Tjon a indica cu ya caba nan a papia cu procurador general (PG) pa entrega e rapport aki cerca dje. E ta bisa cu e rapport aki producto di nan investigacion cu a wordo traha a base di echonan y no di cosnan falso. Nan tin tur documentacion tambe pa asina sostene e sospecho cu nan tin.

Investigacion
El a descarta cu e prome rapport di nan investigacion cu nan lo entrega na OM no tin di haber cu e proyecto di hospital. Esey ta otro asunto, ya cu un comision di profesional riba tur materia lo wordo instala pa atende cu e proyecto aki. Nan a bin cu un mocion den parlamento ora e topico aki a wordo debati pa haci un quick scan riba henter proyecto di hospital. “Ora cu nos a analisa tur e documentonan tin hopi cos cu a bay fout cu e proyecto aki”, el a laga sa.

Pero si e lider di fraccion di MEP ta haya cu tin casonan cu ta crea un preocupacion den nos comunidad. “Diferente topico lo mester wordo investiga”, el a bisa. Tambe e siman aki nan lo percura di entrega un iniciativa di ley, ya cu tin hopi buraco den nos ley cu ta wordo mal uza. E ta haya cu e no ta solamente señala problemanan sino cu como parlamentario nan tin e responsabilidad di convoca e minister en cuestion pa nan para responsabel di nan maneho y te hasta pa nan por haya un mocion di desconfiansa y evita cu un situacion bay asina leu.

Encuesta parlamentario
E biaha aki nan no kier start di biaha cu un encuesta parlamentario manera den pasado MEP a yega di haci. Nan no kier inicia un encuesta parlamentario ya cu segun nos ley, tur informacion cu ta sali afo durante un encuesta parlamentario ta perde su balor, kiermen no por wordo uza mas den otro caso of investigacion. Aunke nan no ta descarta cu eventualmente e encuesta parlamentario lo por bira na di dos step, si esaki lo ta necesario.

El a bisa cu e critica mas grandi cu nan ta keda haya bek ta bin di instancianan imparcial manera Raad van Advies (RdA) y Contraloria General. Nan ta considera cu e rapport Bo Aruba cu a sali ta uno debastador pa e gobierno anterior di signatura di AVP.

Igualmente e ta haya cu e motibo cu pais Aruba ta den e situacion financiero dificil aki ta debi cu e parlamentarionan no a haci nan trabou manera debe ser. “Maneho iresponsabel a wordo hiba. Pero na mes momento como parlamentario bo mester cuestiona.” Pues e ta haya cu e situacion actual cu nos pais ta aden entre otro financieramente, ta debi cu e trabou no a wordo haci manera mester ta.