Aruba! Aña nobo ta den porta y ata nos ki. Ta ami so ta pensa cu 2017 tabata un aña na unda drama tabata riba un otro nivel? Of ta pasobra nos tabata tin eleccion mi ta exagera? Kico tin pa 2018? Un master plan? Ban papia! Pa ora e columna aki wordo publica, mi ta spera mi lo a catch up tur e soño cu mi a perde purbando di skirbi esaki.
E idea di e topico pa e siman aki a yega manera ladron den anochi y ata mi memey madruga ta haci anotacion den mi telefon pa e idea no bay laga mi. Siman pasa mi a skirbi tocante mi prima chikito cu a bisa “Tur dia mi ta lanta wak mi pais bay atras” y mi a priminti di duna mi opinion tocante su ponencia e siman aki. Sinembargo, mi a realisa cu mi no tin mucho pa comenta.
E realidad ta cu mi tambe ta tristo pa Aruba. No pasobra cu mi ta pensa cu e ta bayendo atras, sino mas bien pasobra mi ta mira e isla gara den un circulo vicioso cu mi kier kibra, pero mi no sa con. Mi tin amiga poeta cu a skirbi un poema di amor cu tabata bisa “Mi a bay y mi a bin bek, di continente pa continente y mi a haya abo den e mesun caminda cu mi a laga bo, entre mi mente y mi curason.” Aunke e poema ta uno romantico, e ta describi mi sentimentonan pa cu e isla. Mi mente ta bisa mi algo pero mi curason ta bisa un otro. Bin bek, esey ta den mi curason, pero kico mi lo bin haci? Na ken mi lo tin cu ofrece mi mes pa un bon trabao? Esey mi mente ta cuestiona. Bou di e columna di siman pasa un hende a comenta “Si Aruba ta bayendo atras, e ta politiek verziekt.” Y si nos kier ta honesto, esey ta e realidad. Politica na Aruba ta manera un culto den cual tur hende kier drenta y hopi ta bende te hasta nan moralnan pa garantisa nan luga den dje. Tur kier e beneficionan di traha den gobierno, masha tiki tin e capacidad di funciona corectamente na e funcionnan cu nan ta wordo poni. E stereotipo ey cu “trahado di gobierno ta floho” tin su base. Bo kier pone bo prima Janchi como di hefe di departamento, pasobra e ta bo prima Janchi, pasobra el a vota pa bo y bo a primintie. Pero Janchi nunca a dal un golpi ni di karate, e no sa kico e ta haci, e no a caba un scol, anto e ora ta con e departamento ta bay funciona na un manera optimal? Si Janchi a studia y e ta capacita niun hende lo keha. Ta okay cu politiconan kier take care di nan hendenan, pero mester pensa riba bienestar general tambe.
Boso no ta haya straño cu asina eleccion a pasa, tur e atraconan milagrosamente a disparce? Cu diripiente media a stop di bende nos e idea cu e isla ta peligroso y insigur? Bo ta kere nos politiconan lo a yega asina leu di crea panico bou nan propio hendenan pa garantisa nan victoria? E pensamento so ta pone mi stoma bira. Mi amiga a bisa mi cu e ta contra di e sistema den cual AZV ta traha pasobra e ta haya cu e seguro simplemente mester ta pa hende cu no por afford un otro tipo di cuido medico. El a comenta “Wak, locual ta pasa ora bo ta duna un pueblo asina tanto bo ta mantene nan na bo amen. Nan ta depende di bo y nunca nan lo bay pensa den un manera critico”. Mi otro amiga ta conta mi cu “hendenan di MEP” ta drenta barionan cu ta conoci pa ta AVP anochi terorisanan. Gritando cosnan manera “Nos sa ken boso ta, nos sa unda boso ta traha”. Pero e ta bisa cu e ta inutil causa fanfaria pasobra esunnan di AVP no ta mucho mas miho tampoco y nan tambe ta haci nan cosnan.
Mi ta biba ansha. Mi ta ansha pasobra mi ta preocupa pa tur cos aunke cu nan no ta mi responsabilidad. Mi no tin nada contra niun hende den gobierno, mi ta haya politica algo absolutamente fascinante. Mi no ta bisa cu mi no ta worry cu politica pasobra mi ta consciente cu indirectamente of directamente, decisionnan politico ta afecta ami y pueblo henter. Mi ta cuestiona si tin manera di haci politica un fair game. Cuestiona si pueblo merece honestidad di berdad of si nos mes ta ofrece bira victima di politiconan deshonesto. Nos ta politiek verziekt y aparentemente nos no ta haci mucho esfuerso pa cura.
