Podise cu ora Directora di Departamento di Asunto Social (DAS), Glenda Hernandez, kende ta representa cluster 4 di crisis team ta papia, su palabranan por cay pisa. Pero e no sa disfrasa cu palabranan, y menos sconde, un realidad cu nos ta aden: “Si nos no ta frena e subida aki, nos por haya confronta cu den cierto momento den hospital nos tin cu bay scoge kende lo bay biba y kende lo fayece.”
Segun Hernandez, te hasta e escogencia ey lo por bira un miembro di bo mesun famia y mester evita di yega na e situacion aki. E ta haya cu esaki ta un forma pa gara e seriedad di e situacion actual di Covid na Aruba.
Actualmente nos tin disponibel 12 ICU y ventilador, e cifra aki por scala na 21 te maximo 33. Esey ta e cifra maximo. E ta manera un barco cu ta cuminsa zink y tin tiki salbabida disponibel pa cantidad di hendenan abordo. E panorama hipotetico ta ilustra cu na Aruba nos tin un poblacion di rond di 110 mil habitante, y un capacidad di apenas 33 ICU. Te ainda e situacion hospitalario ta bao control. Pero si nos no ta logra fren’e aworaki, nos ta core e riesgo cu e ta bay for di man.
P’esey Sra. Hernandez su palabranan no por ta mas oportuno, aunke e por sona pisa. Nos ta bibando un situacion hopi serio, pero hopi hende no ta compronde e seriedad di e situacion cu nos ta aden. “Nos a evalua e situacion y nos ta constata cu nos ta actualmente den un crisis serio,” el a bisa
