CAft a bin Aruba, despues di un ausencia fisico di un aña y mey, y a papia bon cla atrobe. No cu e tono tabata negativo, sigur no pa loke nan ta mira den economia. Segun e organismo, Aruba ta riba caminda di recuperacion mas rapido cu loke a pensa te awor. Y esey tin como consecuencia importante cu talvez lo no mester fia tanto placa manera den e aña y pico cu a pasa, pa tene empresario y empleado riba pia. Na final di cuenta, Aruba lo mester paga e placa fia back, aunke por fia di Hulanda na un tasa di interes hopi faborable. Tambe e hecho cu gobierno lo por haya mas entrada for di un economia cu ta recuperando asina bon, ta haci cu por bolbe, mas rapido cu a pensa anteriormente, na e acuerdo cu Hulanda estableci den e protocol.

Esey ta di yega na un aña cu un presupuesto neutral, pa e aña siguiente yega na un surplus di 1% di GDP, pa usa esey pa paga debe. Tur aña tin debe cu ta madura y si sikiera un parti di esey por paga back, envez di refinancia, bo ta riba e bon caminda pa baha e peso cu interes riba prestamo tin riba presupuesto. E peso ey ta hopi grandi, mas di 250 miyon florin pa 2021, pero e presidente di CAft no a menciona e pago anual di mas di 80 miyon florin pa e proyectonan PPP, cu ta haci e peso mas grandi ainda. Pa ta obhetivo: e suma pa PPP no ta solamente capital y interes, pero tin un componente aden di mantencion, pero e sumanan exacto no ta conoci, en todo caso no pa nos.

CAft tabata categorico tambe riba e asunto di e presupuesto cu ainda no ta aproba. Nan ta haya cu gobierno demisionario por bien a trata e presupuesto, pasobra e ta algo cu ta den Constitucion. Esey ta berdad pero tin hopi mas cos den nos Constitucion cu gobierno(nan) ta ignora semper, pues e observacion ey no ta bay impresiona ningun hende den e gobierno demisionario, cu por ta e siguiente tambe, solamente cu partnernan chikito diferente. Nan por bin topa cos manera nan a laga nan atras pa bay campaña. Loke si mester percura pa haci, ta pa no tin e mesun retraso den e siguiente presupuesto, ya cu si tur cos ta bon e parti regular di presupuesto pa fin di juni lo mester tabata cla. Ta e cosnan diferente, den e acuerdo cu Hulanda, ta loke ta tene man ainda. Aunke aki ta bin e problema cu e presupuesto 2021 tambe lo mester revision, mirando e desaroyonan economico mas faborable menciona caba. Esaki tin consecuencia pa e suma necesario di subsidio di salario y asistencia financiero na empresa mediano y chikito, pero por significa menos ayudo financiero di gobierno pa e fondonan di seguro social tambe.

Awor, tocante e recuperacion economico rapido lo por bisa cu esey ta corecto, pero ta sigur cu gobierno por logra pa otro aña caba un presupuesto sin deficit? Segun e cifranan cu gobierno tabatin proyecta pa 2022 den nan presupuesto 2021 (e ‘meerjarenbegroting’), otro aña lo tabatin ainda un deficit di -4,8% di GDP, pa na 2023 yega na 0% deficit. Loke CAft ta propone ta avanza e schedule ey cu un aña, den e sentido cu otro aña caba ta logra yega na 0% deficit y na 2023 cuminza cu e surplus di 1%. Tumando na cuenta cu gobierno ta(bata) calcula un GDP di Afl. 5475 miyon pa fin di 2022, esaki ta significa un entrada extra di alrededor di Afl. 250 miyon. E pregunta ta si economia ta bay crece di e forma spectacular ey, pasobra aunke turismo recupera rapidamente, esey no ta implica cu tur e sectornan cu ta duna servicio relaciona cu turismo ta bay recupera cu mesun velocidad. Ta durante e proximo lunanan nos lo por mira esey.

Otro punto riba cual CAft tabata categorico den su discurso y den contesta na prensa tabata un tema riba cual gobierno a mantene un silencio hermetico durante campaña: e introduccion di un BTW. CAft ta recomenda pa introduci esey mas pronto posible, aunke nan no a bay mas den detaye kico e reforma lo significa na tipo di belasting directo cu ta ocasiona necesidad di hopi administracion (y hopi personal) mientras nan no ta rindi tanto. Tur esaki lo haya su debido atencion si den e operacion cu lo bay tuma lugar cu yegada di COHO. Sin embargo, nos ta keda cu e impresion cu pa un of otro motibo gobierno ta ‘keda lastra pia’ envez di tuma e reforma fiscal na serio. Por ta cu, como politico, nan ta pensando caba riba e reduccion di empleo na Servicio di Impuesto? Nos no ta kere esey, loke si por sucede ta cu por bay usa personal di e servicio na un manera mas eficiente pa aumenta e ‘compliance’, un aspecto cu CAft tambe a toca den nan encuentro cu prensa. En todo caso, campaña a caba, y pareu cu nos tin un gabinete den Bestuurskantoor, e siguiente mandatario encarga cu Finanzas lo mester duna cara, riba presupuesto 2021, 2022, gasto di personal, reforma fiscal, etc. Si no tin crisis mas, y gobierno nobo, no tin excusa mas pa no traha normal.