Despues cu e compania Citgo a informa oficialmente cu, te fin di januari venidero, nan lo keda opera e refineria y tambe e terminal na San Nicolas; a lanta un preocupacion mas grandi cerca e trahadonan y nan respectivo sindicatonan. Ta asina cu a wordo programa un reunion ayera tardi, entre gobierno y e dos sindicatonan IOWUA y FTA, pero na final a dicidi pa pospone e reunion pa awe.

Segun informacion cu a drenta na Bon Dia Aruba ta indica, e intencion tras di e reunion aki ta pa trece trankilidad cerca trahadonan; tambe pa evita un eventual accion cu lo por stroba cu barco cu ta abastece nos isla di combustibel por drenta den terminal na San Nicolas. Sinembargo, Presidente di IOWUA, Boy Anthony a descarta nan participacion den un accion asina cu lo por perhudica nos pais.

FTA.
Di otro banda, sindicato FTA a manda un carta pa gobierno dirigi na Minister President, Evelyn Wever-Croes, caminda nan a pidi pa e mandatario pone atencion urgente pa lo siguiente: Manera ta conoci, diabierna ultimo Citgo Aruba Refining N.V. (CAR) a anuncia na su empleadonan cu entrante 30 di januari 2020, e no lo opera e refineria y terminal di transferencia di combustibel mas y cu lo entrega esaki bek na Refineria di Aruba N.V. (RDA).

Na mes momento a ofrece na e empleadonan un pakete pa asina termina nan relacion di trabao. Sinembargo, pa e empleadonan, di cual FTA ta representa esnan cu ta forma parti di ‘staf’, ta imposibel pa considera cualkier tipo di pakete y/of terminacion di nan acuerdo di trabao, si no tin claridad riba e futuro di e refineria y/of e terminal.

Di parti di gobierno ta pone hopi enfasis riba cumplimento cu ley relaciona cu e empleadonan. Akinan, sinembargo ta wordo papia unicamente di e aspectonan legal pa cu terminacion di e relacion di trabao, y no di e legislacion relaciona cu traspaso di empresa cual ta hancra den titulo 7a seccion cuatro di e Codigo Civil di Aruba.

Hecho ta cu en todo caso operacion di e terminal no por wordo para como cu esaki lo trece suministro di combustibel pa e isla den peliger. Pa cu esaki nos por a compronde for di declaracionnan den prensa, cu Gobierno di Aruba ta sali for di punto di bista cu como cu e terminal di transferencia di combustibel ta cay bou di un entidad legal separa (Citgo Aruba Terminal N.V. (CAT)), no (por) tin traspaso di empresa.

E interpretacion aki, sinembargo ta empugna cu e decision di Tribunal di Husticia Europeo (Europees Hof van Justitie) den e caso Heineken/Albron. Den e caso ey ta wordo determina cu pa e normanan cu ta rigi traspaso di empresa ta aplicabel, no ta necesario pa empleadonan cu ta traha pa e empresa cu ta wordo transferi (den e caso aki CAT) formalmente tin un acuerdo di trabao cu e empresa ey. E ponencia di Gobierno di Aruba pa cu aspecto aki de hecho pues ta incorecto.

Mas claridad.
Pa FTA como representante y consehero di e empleadonan, ta di suma importancia pa haya claridad riba kendenan lo forma parti di e grupo cu lo mester continua nan labornan pa cu e operacion di e refineria y/of terminal di transferencia di combustibel, y kendenan lo no tin cu desplega nan labornan mas entrante 30 di januari 2020.

Ta unicamente na momento cu tin claridad riba e aspecto aki, lo por cuminsa na evalua kico ta husto como compensacion pa e añanan di servicio dependiendo den cual grupo e empleado afecta ta cay.

Pa cu esaki FTA ta solicita un reunion cu caracter di urgencia mas tarda awe, 30 di december 2019 pa 4’or di atardi cu Minister President den representacion di Gobierno di Aruba. Esaki e sindicato ta haci pa garantisa paz laboral na e refineria y terminal di transferencia di combustibel. Ta di mas pa menciona cu e situacion actual di incertidumbre ta causa un tension enorme bou di e empleadonan cual na cualkier momento por resulta den accion(nan) cu lo por tin su efectonan negativo pa Aruba en general.

“Como sindicato, ta nos deber (tambe) pa evita escalacion di e tension, sinembargo nos no por haci esaki si di parti di Gobierno di Aruba no ta duna claridad riba su plannan pa cu continuacion di e operacionnan na e refineria y / of terminal di transferencia di combustibel. Sperando un reaccion di inmediato di parti di Gobierno, nos ta termina.”