Si no ta pa Hulanda…Kico nos ta haya sa…?

Si no ta pa Hulanda, ta cuanto cos nos no ta haya sa mes… Hopi lo no ta di acuerdo cu e ponencia aki, ya cu di mes nan ta contra tur observacion cu por bisa algo positivo di nos compatriotanan di Reino. Y naturalmente nan tin razon ora di berdad mester bisa algo negativo di e pais ey o su gobierno. Lamentablemente den e situacion cu nos ta aden, y no solamente desde e crisis di Covid-19, hopi di e zundramento tin di haci directamente cu e acuerdonan cu a cera den ultimo añanan y cu ta pone un peso grandi riba nos gobierno cu mester cumpli. Esaki no ta conta so pa esnan cu actualmente mester carga e peso aki, pero lo a toca cualkier cu lo ta na e timon awor aki. Pero nos no mester tin demasiado duele di nan tampoco, pasobra nan ta hacie voluntariamente, y paga, y bon tambe.

Den e confrontacion cu Hulanda, na nivel di gobierno, opinionnan ta varia segun e orientacion politico, pa e temanan di e momento aki. Sin embargo, hopi di e zundramento riba Hulanda y su gobierno nos a tende den su version berde den e añanan nos tras. No mester lubida cu nos tin basta aña bao di supervision financiero, y scuchando cierto criticonan lo ta mihor pa confronta nan totalmente, haciendo uso hasta di foronan internacional pa keha e madre patria pa su comportamento ‘neo-colonial’. Cada ken cu ta sinti su mes yama pa cana e caminda ey, tin naturalmente pleno derecho, pero no necesariamente lo haya e resultado cu ta desea. Y esey pa un motibo bastante obvio: no tur cos cu ta sucede den e trato entre gobierno insular y gobierno Hulandes ta muestra di mala voluntad di parti di e ultimo aki, mucho menos tin algo di haci cu ‘neo-colonialismo’. Ta parce cu nos no por trece suficientemente dilanti cu e situacion precario cu nos ta aden ta resultado di e practica politico cu nos mes a permiti durante decadas y cu a crea un monster riba nos, cu awor ya nos no por contene sin ayudo externo. Lo ta un eror pa kere cu e necesidadnan cu nos tin ta placa, cu no t’ey actualmente. Si esey tabata asina, nos lo simplemente fia placa awor, y paga back despues… Pero e storia no ta asina simple, sigur no den e mundo cu ta rondona nos. Esun cu ta dispuesto di fia bo, ta busca pa sa ta con bon pagador lo bo ta durante e periodo di paga back. Y ta ey ta bin dilanti e cantidad di asunto cu e Hulandesnan a trece dilanti, pa nos por paga back. Esey ta nan interes directo tambe, pero cu a lo largo lo conveni nos mes tambe, teniendo un base mas solido pa sigui nos rumbo. Y ora nan ta trece e cosnan alo dilanti, esey no tin nada di ‘malvado’ cune, ta deseo, o hasta exigencia normal den nos situacion. E ta bira ‘malvado’ den vista di esnan cu ta kere cu nan (Hulanda) no tin nada ta exigi, y ta interpreta tur suceso cu e bril di ‘neo-colonial’, y cu nan ta haci tur esaki pa oprimi nos, atrobe, ainda…

Esaki ta brinda e ora un salida facil tambe, pasobra nos no mester discuti loke nan ta propone pa reforma pa crea un base mihor pa nos desaroyo socio-economico. Esaki ta e motibo pakico nos ta tende asina poco discusion tocante e temanan pisa cu ta bin den nos direccion di tur manera? Eleccion a bin te bay, unda cu salvo algun excepcion, mayoria di partido no kier a discuti ningun tema mas den detaye. Y awor cu tin gobierno, tin e tardanza atrobe pa yega na plan gubernamental pa e periodo crucial aki. E punto clave aki ta: mientras Hulanda ta papia cla, nos gobierno no ta parce dispuesto di enfrenta e situacion y bisa nos ‘de una vez por todas’ kico ta tumando lugar. Si no ta pa Hulanda, kico nos ta haya sa realmente? Un bon ehemplo di esaki ta e ley pa limita salario y beneficio pa persona den posicion halto (LNT). Awor cu Hulanda a toca e asunto, den sentido cu Aruba no ta move liher bastante cu e ley aki, segun acuerdo cu nos gobierno, nos ta haya di tende cu tin un ley den preparacion. Y ta gaba de paso cu e ley ta hopi parecido na esun Hulandes, pues no tin tanto ‘clabo pa resolve’. Masha bunita, y danki na e Secretario di Estado pa ‘habri paso’ pa nos, aunke lo mester warda te ora e ley yega parlamento pa nos conoce su contenido mas den detaye. Nos ta comprende caba cu ta sigui trata nos manera un seccion di CIA, unda ta haya detaye ‘on a need to know basis’. Si no ta considera e tema di nos interes, no ta bisa nada. Pa nos suerte nos ta ciudadano Hulandes y si gobierno local ta dejado cu su informacion, no riba e tema particular aki so, sino tur e avalancha di cos cu mester sucede den e proximo añanan y cu ta toca nos tur, ‘que sea asi’. Pero e ora no mester critica prensa despues pa a ‘malinterpreta’ loke gobierno kier bisa. Prensa t’ey pa duna informacion, tambe ora un banda no ta haya esey necesario.