Actualmente tin varios persona cu ta pendiente un yamada di Helpdesk FASE pa sa con ta para cu nan peticion despues di basta tempo cu esaki tabata ‘den proceso’. Awo cu e mei a yega, tin ciudadano cu ta cuestiona si nan a cumpli cu impuesto turestempo y awo no tin contesta, ta kico ta bay haci? No ta sigur tampoco kico ta haci cu empleadonan cu a paga premies pero cu no tabata inscribi na SVb.

Enfocando riba storianan di ciudadanonan cu ta sperando contesta riba nan peticion pa haya ayudo di 950 florin di Fondo Ayudo Social di Emergencia (FASE), Bon Dia a entrevista dos persona cu ta den proceso pero cu te dia di awe no a haya contesta.

‘Kico ta pasa si dunado di trabou a desconta premies pero no a inscribi trahado?’
Prome di bay aplica, Philippe Peterson tabata traha como bartender den sector di horeca na e compania PLZ Horeca, cual ta e compania doño di @7 Club. Riba 15 di maart Peterson a haya sa cu su dunado di trabou lo ta cerando porta pa via di e situacion causa pa COVID-19 y poco tempo despues a yena un peticion pa e asistencia di FASE. Riba 22 di maart el a haya un email di FASE unda ta notifica cu e ta registra den e sistema. Poco tempo despues un trahado a yama pa pidi Peterson pa manda payslip di maart y carta di trabou na e email di FASE pa documento. Peterson a haci esaki riba e mesun dia.

Te awo Peterson no a tende nada di trahadonan di FASE, ni el a mira cu su number a sali riba e pagina cu FASE a publica. Peterson a purba yama den ultimo siman y ayera mes el a yama, pero no ta haya ningun hende riba telefon. E tin miedo cu nunca su dunado di trabou lo a inscribi su persona den SVB y pa e rason ey FASE lo bisa cu e no lo bin na remarca.

Peterson ta conta cu ya e tin mas cu un aña trahando pa e negoshi, pero te mas o menos entre augustus y september ultimo el a haya e papel pa inscribi den SVb, despues di a cuminsa traha full-time den juli. Sinembargo den e tempo ey, trahando split shift y te anochi laat, ‘mi no a haya tempo pa mi por a bay’. November ultimo Peterson a bay pero SVb a bis’e cu pasobra nan ta pasando pa un sistema digital, ta e dunado di trabou lo mester inscribi trahado den sistema entrante november. El a laga su dunado di trabou sa. “Pero mi no ta sigur si nan lo a haci esey. Mi a nota cu nos semper ta understaffed y mi tin duda cu lo haci e cosnan aki. Bo ta lubida of pone un banda, bo sa con e ta”.

Peterson ta cuestiona kico ta bay pasa cu trahado di cual tabata desconta premies y impuesto di nan salario, pero cu awo tin chens cu nan no ta inscribi den SVb y pa tal rason no lo por haya FASE. E ta haya cu e sistema aki a mustra di no traha y cu tin un problema entre manera di traha entre gobierno y asuntonan laboral. “Nos tin deber pa ta inscribi pa nos ta sigura, pero awo kico? Esey ta un sistema corupto. Si mi ta traha henter aña ta pagando tur tipo di impuesto, pero awo mi no ta bin na remarca pasobra mi no ta inscribi, pakico mi a paga e impuesto?”

Confusion entre FASE y Asuntonan Social.
Mateo Garcia Cruz, mescos Peterson, tambe ta sperando contesta riba su peticion. Garcia Cruz ta traha como coki na Ling & Sons via Flexo. 5 di april el a haya notificacion cu e ta wordo manda cas, no work, no pay. Prome cu esey ya caba a reduci e oranan. Ya pa 8 di april Garcia Cruz a aplica pa e sosten financiero di 3 luna. Despues di a manda tur su documentonan, manera firma liber, carta di trabou y payslips, el a haya un yamada di FASE 2 siman despues.

Garcia Cruz a haya straño, pasobra riba telefon tabata puntr’e cuanto aña e tin na Aruba, cuanto aña e tin ta traha. “Nan a puntra mi pakico mi ta aplicando, e ora ey mi a contesta bisando cu e mi a manda e formularionan di FASE, pa e ayudo financiero. Djey nan a bisa cu nan ta di Sociale Zaken y cu nan a kere cu e ta aplicando pa otro cos. Mi a bisa, Ok? mi no a aplica pa otro cos pasobra mi a manda formulario di FASE.”

‘Si mi ta paga impuesto, ken si ta bin na remarca?’
Pasobra inicialmente el a manda algo fout, e personanan yamando di Sociale Zaken a bis’e pa inscribi di nobo pa haya un number di registracion nobo. Pero algo no a sinta bon den dje, y el a dicidi di yama FASE. FASE a bis’e pa no entrega un aplicacion di nobo pasobra asina e no lo bin na remarca, mas bien e lo mester upload e documento corecto via e website. FASE a bisa pa no haci loke Sociale Zaken bisa pa haci.

Fuera di e confusion, Garcia Cruz a bay check riba e website y parce cu su number no a sali ainda. “Por ta cu ami no ta cay den remarca. Pero e ora ey kico bo mester pa bin na remarca? Si mi a cumpli cu tur cos, cu firma liber, carta di trabou, pago di belasting cada aña, tur cos, y awo den crisis nan no ta cumpli cu un subsidio cu nan a bisa nan lo bay paga pa 3 luna?”, Garcia Cruz a cuestiona.

“Si ami no tin trabou y mi no tin entrada, con mi ta bay come, con mi ta bay paga awa y coriente, kico mi ta bay haci? Si pa ley aki 3 luna nan tin derecho pa corta tur cos pasobra mi no a cumpli cu pago, ken ta sigura mi cu despues di 3 luna mi tin coriente y awa? Si mi no haya trabou bek, ni tampoco placa pa paga esaki?”. Garcia Cruz ta haya cu no ta corecto cu gobernantenan ta papia di ‘pone man na curason y yuda otro’ mientras esaki ta pasando.