Te aworaki minister di Financia, sr. Angel Bermudez no ta mira cu presidente Mericano, Donald Trump su maneho economico lo tin su efecto riba nos isla.
Minister Bermudez ta kere cu si e no exclui e pronostico di e presidente nobo di Merca kende basicamente ta predicando cu su gobierno lo stimula economia di su pais den su totalidad. Ya cu e kier pa inversionnan por tuma luga denter di teritorio Mericano, muy particularmente e companianan multi nacional, minister Bermudez ta kere cu nos turismo lo wordo beneficia tog di e maneho aki.
El a indica cu nos turismo ta depende gran parti di e mercado turistico Mericano, y esey tin su base naturalmente dor di e exito economico di nan pais. “Si Merca ta bay bon economicamente, automaticamente nan residentenan ta haya e forsa economico pa bay cu vakantie”, el a bisa. Den e caso aki logicamente Aruba ta beneficia di e factor aki.
Sinembargo minister Bermudez ta kere cu nos mester haci ta percura pa nos calidad di producto cu nos ta ofrece e Mericanonan ta den tal indole cu berdaderamente e Mericanonan ta keda bishita nos pais a base di e poder economico cu nan ta ganando. El a bisa cu nos region Caribense fuera di servicio turistico no ta produci productonan di materia prima. P’esey e ta kere cu e servicio cu nos por ofrece muy particularmente riba mercado turistico ta beneficia ora cu nos ta ricibi bishitantenan di un pais economicamente fuerte. Como un ehempel el a trece e ehempel di Venezuela cu tabata nos principal mercado na Latino America y e di dos mas grandi cu nos tabatin, pero cu a cay barbaramente pa motibo di nan situacion economico. “Na momento cu economia no ta fuerte nos ta ripara e efecto riba esunnan cu normalmente ta bishita nos”, Bermudez a bisa.
P’esey e ta kere cu berdaderamente si Merca ta logra fortifica su economia esey lo por tin efecto positivo pa nos turismo.
