Parlamentario Edgard Vrolijk ta na spera di e dia cu presidente di Parlamento lo yama un reunion pa trata e ley di financiamento di partidonan politico cu por fin ta cla. El a yega di entrega e ley aki hunto cu su colega, Rocco Tjon.

E ta haya un berguensa cu Aruba ta e unico pais den Reino cu no ta ratifica cu tipo di ley asina. E ta bira un instrumento pa combati corupcion, pero nos mester ratifica e ley aki. Nan a yega di entrega e concepto di ley aki na Gobernador di Aruba cu ta e persona cu tin cu ratifica finalmente e ley menciona.

Segun parlamentario Vrolijk, e ley ta bisa bo bon cla y adelanta kico bo por y kico bo no por haci. Pero e ta reconoce cu a pesar di e mesun tipo di ley existente, acto di corupcion ta sigui sosode. “Corupcion bo no ta bay kita. Sinberguensa den e pais, bo no ta bay kita den niun caminda rond mundo” el a bisa. Pero alomenos e beneficio ta cu nos por tin un mecanismo estableci pa hiba control riba fluho di placa den campaña politico.

Te ainda no tin un fecha den agenda di parlamento pa trata e ley aki cu no ta uno nobo. E ta data for di 22 aña pasa, pero te ainda e ley aki no a wordo pasa. El a referi cu practicamente un 60% di e contenido di e ley a wordo presenta den pasado.

Nan a wordo complementa cu e consehonan duna na Raad van Advies (RvA), y tambe un parti nobo cu a wordo añadi na e ley aki. Pero tambe a base di statuto di GREGO pa combati corupcion. Nan a complementa e ley di financiamento politico cu locual tin na Corsou, St. Maarten y Hulanda. E apropiacion aki lo facilita pa Ministerio Publico (OM) por haci su trabao mas lihe, segun parlamentario Vrolijk.

Prohibicion

Den e ley aki ta prohibi pa e fundacionnan lanta pa e candidatonan politico durante nan campaña no por tuma placa for di exterior. Igualmente e ley aki, si e ta wordo aproba, ta prohibi gastamento di placa for di fondo di pueblo.

E ta prohibi pa ministernan haci uzo di entidad gubernamental pa core campaña. Den e ley no ta poni e posibilidad cu gobierno mes por financia e partidonan politico. El a bisa na Bon Dia Aruba cu esaki ta un punto cu a bin den e consehonan. Pero mirando nos situacion financiero cu no tin ni pa paga salario, corda pa financia partidonan politico. Pero e ta kere cu den futuro unabes cu nos pais stabilisa bek for di e crisis actual, den futuro lo por haci cambio riba e ley aki.

El a bisa cu ultimo tempo e ley a tarda pa wordo traha debi cu tin diferente factor cu mester tene na cuenta den trahamento di ley. E mester bay departamento huridico tambe, caminda nan mester atende cu cierto ley urgente y di prioridad pa gobierno por opera. Pero na final di dia e ley ta cla cu ta hopi importante.

E parti di transparencia e ta considera importante di e ley aki. E candidatonan politico por ricibi cierto suma, pero e nomber di nan sponsor politico ta wordo registra. Ya cu awendia comunidad tin e pensamento cu di adelanta caba sa ken ta gana destahonan publico. Mientras cu e ley aki lo ta uno anti monopolio y tambe lo crea oportunidad pa otronan por participa.