Hopi investigacion tocante literatura Caribense ta tuma luga na Hulanda. Si e investigacionnan aki lo tuma luga na Aruba mes, niun studiante lo tin cu “trece algo” bek. Esaki un studiante na Hulanda, kende ta prefera di keda anonimo ta comparti cu Bon Dia Aruba.
Segun e studiante el a move bay biba na Hulanda su so. E ta biba trankil den centro di Amsterdam. Cu tempo, el a sinja asocia Amsterdam cu tanto structura y libertad.
“Mi a sinja yega tur caminda miso, mi a sera conoci cu e bida ‘organisa y puntual’ cu tanto nan ta taha nos di dje riba e isla. Inicialmente mi kier a studia ley pero un poco
siman prome cu e estudio a cuminsa mi a cambia mi mente.Un trahado di e universidad a mandami un email dunando mi un warning cu e studio ta hopi taalig. Aunke mi a haya un 10 pa mi mondeling examen den VWO. Aun asina mi a duda, e ora mi a sigui mi pasion y bay e programa di literatura na e mesun universidad”
Buscando similaridad
E hoben ta conta cu na Universiteit van Amsterdam, e tabata duro pa “fit in” pasobra tanto e companjeronan di klas como e docentenan tabata opera den un manera cu nan ta gewoon asumi cu tur hende ta Hulandes. “Pa e motibo ey mi a cuminsa busca hobennan cu a bin Hulanda pa studia, pero no a crece eynan. Amsterdam a stimulami hopi. No solamente pasobra autornan di tur parti di mundo ta yega e ciudad manera celebridadnan dunando hopi lecturanan. Pero tin un “cultural heart” den e escena Urbano Hulandes cu ta bibo pa motibo di hopi artista hoben di tur parti di mundo y esaki ta incluyendo Caribe” E hoben ta menciona
Activista Caribense
“E echo cu mi a conoce asina tanto artista y activista Arubiano na Hulanda y no na Aruba mes ya caba ta papia pa su mes” E hoben ta subraya. Segun e, e brug entre justicia social y arte por pasa na Aruba riba e mesun intensidad cu e ta pasa na Hulanda si e cuminsa ora cu hobennan ainda ta den scol secundario. “ Cambio social na Aruba por pasa hopi lihe si e cuminsa mas trempan. Podise e ora lo tin menos sentimento di tin cu “trece algo bek” di Hulanda. Mi kier bay bek Aruba pasobra hopi di mi trabou ta enfoca riba literatura Caribense. Pero, mi ta sinti cu mi mester haya mas experiencia pa asina por crea espacionan na Aruba unda justicia social, arte y humanities por triunfa riba un post graduate level. Actualmente hopi di e investigacion di literatura Arubiano ta concentra na Leiden na Koninklijk Instituut voor Taal, Land en Volkenkunde. Mi sonjo lo ta cu e expertisio ey wordo realoca na Aruba na luga di ta asina leu di e cultura unda e ta origina. Pa establece Aruba manera e curason di no solamente arte, pero tambe cultural research y critica cu ta wordo crea pa e isla y door hende di e isla” .
