ORAJESTAD – Diabierna ultimo, partido di oposicion AVP a organisa loke nan a yama nan prome manifestacion nacional, ya cu nan a priminti cu lo bin mas marcha, si gabinete di coalicion Wever-Croes (MEP-POR-RED) no ta cambia e rumbo di nan gobernacion.
Nan a yega di entrega un manifiesto di 10 punto. Un di e punto cu nan a trece dilanti den e manifiesto aki cu costo di bida a subi y lo sigui subi cu aumento di impuesto indirecto manera Fondo Monetario Internacional (IMF) a conseha gobierno recientemente.
Parlamentario y lider di fraccion di AVP, Marlon Sneek a declara cu e parti aki di BBO pa haci’e 10%, directora di departamento di belasting a yega di divulga den un entrevista cu IMF a propone pa bin cu un tax di 10%. Sinembargo e ta haya cu e gobernante no ta bisa pueblo e berdad. P’esey nan ta cualifica e eleccion ultimo di 2017 como un ‘engaño electoral’, ya cu varios promesa electoral no a wordo honra ni cumpli.
Sneek a indica cu pa nan ta importante cu den presupuesto 2019 a pone bon cla cu den e di dos mita di aña lo bin cu un SIN tax pa por produci 14.5 miyon mas. “Asina e presupuesto a wordo traha,” el a declara. Pues el a conclui cu si e SIN Tax aki no ta bin, e 14.5 miyon lo mester bin di otro caminda. P’esey e no ta descarta cu pronto gobierno lo bin cu otro tipo di medida.
