Ainda gobierno ta den deliberacion cerca e gremionan y diferente partner, si e controversial sugar tax lo keda un componente di e reforma fiscal y con e impuesto aki lo wordo introduci.

E medida aki cu gobierno tin pensa di introduci -segun Prome Minister, Evelyn Wever-Croes- a wordo ricibi cu sentimento mixto. Despues di sostene un reunion cu e gremio comercial, gobierno kier haya un espacio pa bin cu un balans.

“Si nos ta haya otro manera pa cubri e deficit financiero, nos lo tin por lo menos un dolor di cabes menos, y nos lo tin cu deal solamente cu e parti di salud”, el a bisa.

Te ainda no a cay un decision definitivo riba sugar tax. Sinembargo, si nan lo bin cune lo ta den forma temporal. E motibo no ta uno specificamente pa genera entrada den caha di gobierno pa atende cu su gastonan. Sino cu e tin di haber tambe cu salud di hende, cu ta un peso pa nos seguro medico general (AZV).

Wever-Croes ta haya cu purba di frena e consumo di productonan cu ta dañino pa salud ta un idea cu mayoria di hende ta carga. Ademas e tipo di belasting contra producto cu ta afecta salud ta algo universal. “Bo tin cu yuda pa comunidad haci escogencia mas saludabel, ta un realidad cu nos ta biba cune”, el a bisa.

Pero analisando e resultado di un sorto di impuesto asina den e paisnan cu a wordo introduci, e sugar tax ta bay frena e consumo. “Si e ta frena e consumo, e hendenan ta bebe menos y e entrada ta bay baha tambe.” P’esey nos prome mandatario a laga sa cu e introduccion di un sorto di belasting asina, cu ta frena consumo, ta algo temporal.

E mester wordo reemplasa despues pa algo diferente. E no ta nenga cu nan ta bin cu e medida aki pa motibo financiero. No solamente cu nan tin un gap financiero pa cera, sino cu e gastonan ta birando demasiado halto pa nos pais sigui carg’e.

Te asina leu cu si e situacion ta sigui asina, nan tin cu yega bek na e comunidad cu e pregunta si mester elimina AZV pa tur hende. Ya caba AZV mester di 20 miyon mas pa otro aña riba nan presupuesto, y gobierno no tin caminda pa hay’e.

E no ta spera cu mester yega asina leu, ya cu un seguro di e caliber aki ta un bendicion pa Aruba. Pero e no ta haya husto cu e peso grandi aki comunidad mester carga, pasobra tin un grupo di persona cu no ta scoge pa hiba un bida saludabel. Mientras cu esunnan cu ta percura pa un bon salud, mester paga p’e.

E idea tras di un tipo di impuesto asina ta pa frena cierto comportacion y despues nan ta ampli’e gradualmente. Kiermen na e momento aki ta wordo papia di sugar tax riba refresco pa frena e consumo riba e tipo di bebida aki. Mientras cu nan no ta frena e uzo di sucu mes den puiro, of den juice, ketchup y otro productonan cu tin sucu y cu normalmente nos tur ta consumi.

Aunke e ta mira cu nan oponente politico a haci un ‘drama hopi mas grandi di dje’.