Si entrada sigui baha SVb mester cuminsa uza reserva di fondo di pension

Minister di Finanzas y Asunto Economico, Xiomara Ruiz-Maduro a informa parlamento cu tanto SVb y di AZV ta mustra caida drastico.

E mandatario a referi na entrada di fondo di pensioen administra pa Banco di Seguro Social (SVb). El a bisa cu SVb a mira un caida di 22.5% for di april, compara cu e mesun luna aña pasa. E instancia aki a ricibi un suma di alrededor di 24 miyon pa luna pa e prima destina pa gasto di pensioen di nos grandinan. Na momento cu e entradanan aki ta cuminsa cay bao e suma ey, mester cuminsa uza e reserva cu SVb tin di nan fondo, segun minister di Finanzas.

E instituto aki tin reserva pa cubri tres luna. Mientras cu tur indicacion ta mustra cu SVb mester cuminsa uza e reserva cu nan tin. Mientras cu gobierno mester percura pa por cubri locual SVb ta perde na entrada. El a remarca cu speransa ta e subsidio di salario cu ta bay yuda cu e primanan di SVb.

AZV.
E proyeccion ta mustra cu AZV ta bay cay alrededor di 75 miyon den aña 2020. El a indica cu AZV ta baha cu 22.9%. Den esey Hulanda su posicion ta cu nan ta yuda cu e sosten financiero pa nos seguro medico general. Pero mester reduci gastonan den AZV. E mester ta un reduccion di 5 miyon florin pa luna pa un suma total di 35 miyon pa 2020. Segun e mandatario, mas cu e mita ta esun cu ta wordo proyecta cu pais Aruba ta bay cay atras den entrada.

El a cualifica e situacion aki como ‘sumamente dificil.’ E mandatario a trece dilanti cu su colega di Salubridad Publico encarga cu AZV, Dangui Oduber, a presenta un plan cu parlamento a delibera riba dje caba. Pero ya Hulanda a cuminsa reduci e ayudo financiero destina pa AZV cu 5 miyon florin pa luna. Segun Ruiz-Maduro, Hulanda a sali for di punto di bista caba cu Aruba lo reduci e gasto di AZV.

Si nos compara e prima di AZV di 2019 cu 2020, na april e suma a baha caba cu 40.8% pa loke ta e BAZV. El a bisa cu e subsidio di salario a bira un ayudo pa bay contribui cu e prima di AZV. Aunke apenas e prome biaha a wordo entrega na mei ultimo. Pero e ta kere cu pa juni si e prima aki lo wordo refleha riba entrada destina pa AZV.