Si economia no ta draai nos ta keda haya problemanan social

Den cuadro di aprobacion di presupuesto 2018, parlamentario Setty Christiaans-Yarzagaray (MEP) a referi cu Aruba su economia a bay den recesion for di 3 aña. Practicamente economia a stagna y awor nos ta bay den caida den crecemento economico. E ta full di acuerdo cu gobierno cu no ta e momento pa solamente pone full atencion riba un balans financiero.

“Si nos no draai economia, sino keda draai solamente finanza, nos ta keda haya problemanan social.” Esaki pa via cu bo placa di bo economia no ta draai pasobra bo ta bezig saneando bo situacion financiero so. Esaki ta un refleho di loke a sosode den pasado caminda e parti social a sufri, segun e parlamentario aki. Nan kier atende y drecha e problemanan social cu tin, y esaki a bira un escogencia cu e gobierno di coalicion a haci. “Ami ta para tras di e escogencia ey.”

“Si nos no draai economia, sino keda draai solamente finanza, nos ta keda haya problemanan social.”

Pero di otro banda nan lo keda tras di gobierno pa monitor esaki di cerca. Aunke e plan social ta conoci, e plan economico ainda ta pendiente di su finalisacion social, segun parlamentario Christiaans-Yarzagaray. Sinembargo e memorandum economico-financiero di gobierno ta duna un linea di kico lo ta su maneho. Pero tambe fraccion di MEP ta urgi gobierno di su banda pasobra nan kier wak un plan economico mirando cu esaki ta hopi importante pa sa den cual direccion nos kier bay.

El a agrega cu nos sa cu desaroya economia so tambe lo resulta den entrada den caha di un gobierno. Pues un plan social conhunto cu un desaroyo positivo den economia tin su beneficionan no solo pa negoshinan sino pa e trahadonan y nan famianan. Tambe economia mester draai pa hendenan por haya trabou pa asina nos hubentud ora cu nan ta bin cla cu nan estudio por drenta den nos forsa laboral. “E ciclo aki mester draai bek.”

Esaki ta e impulso cu nan ta ripara for di e tereno cu plan social ta wordo hinca aden, pa drecha e plan social sperando no solamente inversionnan cu gobierno ta bin cu ne. Pero logicamente di e sector priva tambe. Esaki tabata e focus primordialmente poni den e tratamento di e presupuesto ultimo.