Departamento di Meteorologico a mantene e pronostico. Esaki ta indica cu si e situacion di e tempo akinan desaroya y bin den vecindario di Aruba, e ora pa e parti di diahuebs bayendo pe resto di weekend por haya algun awasero. Prome Minister Mike Eman a reuni cu diferente parti cu ta forma parti di e grupo cu ta cay bou guia di Departamento di Calamidad na momento cu nan ta premira cu por tin desaroyonan cu ta rekeri e organisacion di hopi departamento pa atende cu cualkier reto, cualkier peliger di calamidad.
Na e momentonan aki, esaki no ta e caso.
Sinembargo mirando cu tin un tempo den desaroyo cu a wordo pronostica pa yega Aruba diahuebs cu diabierna, e tabata importante pa Departamento di Calamidad hunto cu KPA, Departamento di Salubridad, Brandweer, Departamento Meteorologico, pa tuma e pasonan necesario den e dianan aki. Esaki ta pa haci e preparacionnan.
Minister Eman a duna e ultimo informacion di Departamento Meteorologico. “Desde antayera mi colega Oduber y mi persona a haci diferente palabracionnan pa mira con nos por structura e informacionnan cu ta sali for di Departamento Meteorologico na un forma cu ta keda bon pe publico ta bon informa.” Nan a dicidi cu cada tanto ora Departamento di Meteorologico lo duna informacion. Tambe Minister ta compronde cu prensa memey di e informacionnan ey lo kier mas informacion. Pero Departamento di Meteorologico cada bes kier haci e evaluacion a base di datonan nobo cu nan ta haya. Nan kier haci esaki, prome cu nan por duna e siguiente relato nobo.
Tene comprension
E mandatario ta pidi miembronan di prensa pa tene comprension pe echo cu Departamento di Meteorologico ta traha segun un structura. Nan ta acumula informacion prome for di diferente fuente, y despues nan por saca un boletin oficial pa duna e ultimo dato di tempo. E mandatario a sigui indica cu nan a haya un ‘briefing’ riba e ultimo informacion riba e tempo cu tur hende tin wowo riba dje.
Centro di circulacion
Sr. Mark Oduber, hefe di Departamento di Meteorologico, a duna e ultimo ‘update’ relacion cu e tempo cu ta ubica 2 mil kilometer oost di Aruba. Segun sr. Oduber, e tempo ainda ta ubica entre Africa y Caribe. E ultimo indicacionnan ta indica cu nan a kere prome cu ora e avion di Centro Horcan lo a bula aden, nan lo haya un centro di circulacion. Pero e avion a bula hopi den dje y no a haya un centro di circulacion. “Algun area tabata tin bientonan di tormenta tropical, pero esey no kiermen cu e ta bira un tormenta tropical,” sr. Oduber a indica. Te ora cu haya un centro di circulacion defini, e ora por haci un depresion tropical of un tormenta tropical. Esaki no tabata caso, kiermen el a keda un ola tropical fuerte.
Indicacion di modelonan
E indicacion di e modelonan si ta indica manera e ola tropical ta moviendo riba e ruta west noordwest, e por haya un tiki mas forsa y desaroya. “Manera Minister President a indica caba, e indicacion ta cu si e modelonan ta bastante bon of esun cu nos ta haciendo uzo di dje bou recomendacion di National Hurricane Center pa duna un miho indicacion, e ora si e desaroyo y haya un centro di circulacion, esakinan lo ta mas o menos 150 pa 200 km/h noord di Aruba entre diahuebs laat pa diabierna. Esaki ta nifica cu mientras e ta un ola tropical coriendo e ruta west, si e desaroya e ora ey e por trece awa pa nos cuminsando diahuebs,” segun sr. Oduber. E biento lo por boltia, pero tambe lama lo por boltia den e periodo di diahuebs te cu diadomingo. Despues di diadomingo por haya cu e biento lo bira bek mas oost. Mientras cu e lama si lo mester sigui un tiki di cerca si e ta drecha of no.
Ta mantene e pronostico
Departamento di Meteorologico ta mantene cu e pronostico ta indica si e situacion di e tempo akinan desaroya y bin den vecindario di Aruba, e ora pa e parti di diahuebs bayendo pe resto di weekend por haya algun awasero. E awasero lo por cay un tiki pisa, y esey por crea un inundacion di termino corto na cierto bario of cayanan, despues e riolering lo chupa e awa y manda esaki bek pa lama. E di dos cos ta cu e lama si ta mustra cu ainda e por bira un tiki brabo, hasta na e costa banda west cu ta protegi. “E biento por boltia. Ora e biento boltia weitando e forsa cu e tabata proyecta, e no ta mustra un forsa asina fuerte cu nos ta wak un problema grandi. Aruba ta conoci cu biento fuerte, solamente for di oost y noordoost. Por ta solamente si biento a bolter un tiki zuid y un tiki west, pero e forsa ta manera nos ta haya hopi biaha caba. E casnan ta traha pa tipo di bientonan ey,” el a sigui bisa. Solamente e lama por bira un tiki fastioso y esey por haya ora cu biento bolter.
Contacto
Servicio Meteorologico tabata den contacto cu diferente servicio meteorologico rond den e region pa coordina constantemente cu diferente instancia den e region. Segun sr. Oduber, ayera mainta y atardi nan tabata tin contacto cu Hurricane Center.
