Sindicato FTA, cu ta representa un grupo di trahado di staf na servicio di Citgo, a reacciona riba gobierno su anuncio cu nan ta abstene di intermedia entre Citgo y e trahadonan.
Ta asina cu di un banda, gobierno ta señala den su comunicado emiti diabierna ultimo cu no ta participe entre Citgo y su trahadonan. Tambe gobierno a descarta e posibilidad pa Refineria di Aruba (RdA) por tuma cierto trahadonan over; ya cu e compania estatal aki no ta generando entrada.
Dilanti e situacion aki, presidente di FTA Hubert Dirksz a declara na Bon Dia Aruba cu den cualkier situacion caminda tin problemanan di interes nacional y general, gobierno mester asumi su responsabilidad. E ta haya cu den caso cu por tini posibilidad pa disturbio of desacuerdo, te hasta yega na accionnan y paro di trabou den terminal, cu por tin efecto riba nos turismo, operacion y infrastructura, gobierno mester atende cu esaki.
“Ami no ta kere cu ta responsabel pa gobierno djis laga esaki pasa sin mas”, e veterano sindicalista a bisa. Den un caso asina, e no ta descarta cu corte por manda tur hende bay traha. “Pero con nan por bay traha, si no tin un garantia di salario”, el a cuestiona.
El a bisa cu nan sa cu Citgo tin placa, pero nan situacion relaciona cu e embargo ta haci cu nan no por opera. P’esey mes gobierno a yega asina leu pa bini cu un acuerdo di entendimento (MoU) y despues cu un acuerdo pa suspende e operacion, caminda e propiedad ta pasa pa RdA, manera FTA a compronde.
Citgo y pago di salario.
E sindicalista ta kere cu e parti importante ta pa haya sa kende ta e operador nobo. Ya cu di e forma aki FTA por ta trankil cu operador nobo automaticamente lo tuma e trahadonan over. Pues e operado nobo mester keda encarga pa traha e salario y tuma tur aña di servicio, condicionnan di trabou di e trahadonan.
“Pero nos sa cu Citgo no ta sin mas e no tin placa, sino door di embargo”, segun presidente di FTA. A pesar cu e embargo a tuma luga, e trahadonan te cu awe a yega di cobra nan salario. FTA ta kere cu si esey ta pasa, e por sigui pasa pa largo tempo. “Esey nos no por duna contesta”, el a afirma.
Na momento cu tin dificultad pa sigui paga e trahadonan cu ta resta, FTA ta kere cu automaticamente e problema ta aumenta inmediatamente. “Si yega un momento cu Citgo no por cumpli cu e salario di e trahadonan, di biaha esaki lo causa cu tin paro di trabou”, e sindicalista a bisa. Aunke esaki no ta na su luga -segun Dirksz- pero e trahadonan no por haci otro. P’esey mes e ta afirma cu e responsabilidad di gobierno ta na su luga.
Apelacion na gobierno.
Presidente di FTA a haci un apelacion na gobierno pa tene cuenta cu e situacion aki. Como sindicato nan ta consciente cu e problema entre Citgo como dunado di trahado y e trahadonan representa pa FTA, ta keda responsabilidad di nan dos. Pero den e caso aki e ta afirma cu ‘gobierno no por core pa su responsabilidad’.
FTA por compronde e anuncio caminda nan ta verifica e posicion di gobierno, cual den su prome declaracion, na momento cu a firma e MoU a bisa esey tambe. Kiermen cu e problema di e trahadonan ta cu nan dunado di trabou. Den principio, FTA no tin hopi problema den e caso aki. Y si tin un problema di insiguridad nan tin cu atende cu Citgo, locual nan ta haciendo tambe. Pero loke si ta cu na momento cu Citgo no por duna un contesta y incertidumbre ta bira grandi, gobierno mester interveni.
