Diamars a bin dilanti den parlamento cu si Citgo kibra e contract pa motibonan cu ta wordo atribui na nan, nan ta obliga e ora pa desmantela e refineria riba propio gasto. Esey segun gobierno, ta un punto importante pa tene na cuenta.
E gastonan neto pa desmantelacion di e refineria ta calcula riba un suma di 60 miyon florin. E riesgo financiero segun gobierno e tempo ey lo ta cubri e balor calcula di e terminal di transbordo (olie overslagterminal) cu ta mas o menos 110 miyon. E shares di actividad a base di sales y merkadeo a wordo traspasa di Valero pa pais Aruba riba un balor calcula di 40 miyon. Por cierto tin un disputa di e suma ey tambe por medio di RDA (Refineria di Aruba) cu e no ta bal e suma aki. Tambe tin un ‘Parent Company Guarantee’ di PDV Holding na 150 miyon.
Den e contract ta para cu si no tin un contractbreuk anto e contract a wordo debidamente cumpli cu ne, e ora tin un termino contractual di huur di 15 aña cu posibilidad pa extende cu 10 aña mas. Anto e ora RDA y Citgo lo cubri gastonan di desmantelacion 50/50. Dia cu gobierno a reuni cu vice presidente di Citgo, nan a wordo informa cu ta calcula mas o menos 300 persona lo haya nan retiro cerca e contratistanan. Entre nan mas o menos 150 persona local.
Kibra contract
Parlamentario Alan Howell di fracion POR a puntra gobierno kico lo pasa den caso di contractbreuk cu Citgo. Den caso di esaki gobierno ta bisa cu nan lo actua segun e stipulacionnan den e contract mes den casonan asina, pero prome cu yega asina leu gobierno tin cu informa parlamento ainda debidamente riba esey tambe. Segun e Memorie van toelichting, Citgo lo a bay duna trabao na mas o menos 600 persona directamente y 400 via contratista. Den periodonan di peak/rehabilitacion, lo por crea 3.000 cuponan di trabao directo y indirecto. Den caso cu contract kibra, esaki ta pues e cantidad cu no lo wordo emplea e ora.
Sancion di Merca
E siman aki gobierno a subraya cu tanten sancionnan di parti di Merca ta na luga, Citgo no por haya e financiamento pa Aruba. Cualkier prestamo cu Citgo haci mester wordo paga dentro di 90 dia. Referiendo na ordo ehecutivo di 24 augustus 2017 di presidente Mericano Donald Trump, ta stipula kico ta e transacionnan cu ta prohibi. Anto un di nan ta debe nobo cu ta madura despues di 90 di petrolio di Venezuela (PDVSA).
Esey kiermen cu nan no por presta placa pa un periodo mas largo cu 90 dia. Ora nos ta papiando di un prestamo di inversion na Aruba, ta un debe asina grandi cu ningun hende por paga esaki bek den 90 dia. Referiendo awor na ordo ehecutivo di 18 di maart 2015, esaki ta trata blokeo di propiedad y suspension di entrada di cualkier persona contribuyendo na e situacion na Venezuela. E tempo ey caba Merca tabata reflehando e posicion cu nan tabata bayendo. Merca no tabata tin wowo solamente riba gobierno di Venezuela, pero tambe riba su aliadonan.
Salario
Parlamentario Ricardo Croes (RED) a puntra gobierno riba salario di trahadonan di Citgo y si nan lo sigui cobra esaki, si gobierno lo tin cu paga nan salario? “Nos a compronde di nan cu trahadonan di Citgo mes no ta core peliger di perde nan trabao. Ta e contratistanan pasobra nan tin cu stop e proyectonan. Pero kico cu ta e caso mes, gobierno no tin e placa pa paga salario di otro hende. Nos ta luchando pa paga salario di e aparato gubernamental”, prome minister Evelyn Wever-Croes (MEP) ta bisa.
‘Trahando duro pa solucion’
Riba kico lo por spera pa Citgo riba termino corto,nos no por spera mucho segun gobierno.
P’esey tambe Citgo a tuma e paso pa bay papia cu gobierno y splica nan cu nan tin cu pone e inversionnan ‘on hold’ pasobra nan no ta mira cu riba termino corto nan por sali afo cu e medidanan cu autoridadnan Mericano a impone.
E sancionnan aki ta impedi cu nan por haci cualkier inversion den refineria, y p’esey nan a anuncia e slow down. Gobierno a papia cu James Cristman , vice presidente di Citgo anto e ta bisa cu ‘duele nan tin cu slow down e proyecto pa e proximo tempo. Ta trahando duro riba un solucion y ta spera di por resumi cu henter e proyecto den futuro cercano.’
