Si cambio di medida no duna resultado, Por bolbe implementa shelter in place

Ayera mainta durante un conferencia di prensa di Gobierno di Aruba y Crisis Team, a anuncia algun cambio cu a haci pa loke ta trata medidanan di prevencion, mirando e aumento di casonan positivo di e virus Covid-19 na Aruba.

Pa cu esaki, prome minister Evelyn Wever-Croes a menciona cu e casonan cu tin di haci cu variantenan di e virus no ta haci e situacion mas facil. Aruba no ta diferente den esaki: e casonan na principio no tabata hopi, pero e ultimo dianan a mira un aumento di casonan.

Wever-Croes a splica cu e situacion cu Aruba ta na e momentonan aki ta nifica cu te ainda nos ta den e di tres ola. Te cu e ultimo rapport, a registra 394 caso activo y 82 morto. E averahe pa dia ta di 50 caso nobo hunto cu 32 persona den hospital, 10 ta den unidad di Cuido Intensivo y 22 riba unidad general.

Tambe, el a papia tocante dia 18 di maart, durante cual un gran parti di comunidad a sali pa disfruta di un dia liber, relatando con el a spanta ora el a mira e aglomeracion di hende y con no tabata atende cu e reglanan na area di Eagle Beach.

Tambe ta existi e diferente variante y entre nan, esun mas preocupante – segun prome minister a sigura – ta esun di Brasil, Britanico y di Sur Africa. E demas variante no ta considera te ainda como variante di preocupacion.

Pa loke ta trata e casonan registra pa dia, el a sigura cu hopi di e personanan aki no sa of no kier comparti na unda nan a haya e virus. E ora ey nan ta constata cu nan no tin e fuente bao control y ta existi e plamamento, loke ta nifica un problema.

E cambio di medidanan – segun el a sigura – ta un plan di escalacion. Si e prome paso tuma ayera no yuda, lo escala esey den poco dianan dilanti. Si esey tampoco yuda tin cu bolbe introduci mas medida. Pero te e momentonan aki nan lo mantene e medidanan cu ta vigente caba, pero di manera mas reforsa.

Si e medidanan aki no traha, lo aumenta nan pa dia 1 di april, aunke Wever-Croes a informa cu por ta prome cu e fecha ey tambe, y cu esey ta depende di con e cifranan lo sigui desaroya den e dianan aki.

Si tuma e decision di escala e medidanan lo por yega na e punto di permiti servicionan esencial so. Tiendanan cu ta wordo considera como esencial lo wordo limita na 50%, como tambe limita e cantidad di hende na trabao, cera tur servicio cu no ta esencial, bay back na un shelter in place y cera scolnan.

“Cu esaki nos lo cuminsa kita mas hende for di caya y eynan e hendenan mester ta mas prudente” prome minister a señala.

Hunto cu prome minister tambe tabata presente Vanessa Kock di Cuerpo di Polis di Aruba . Kock a remarca e situacion cu e cual nan a bin confrontando e ultimo dianan, specialmente 18 di maart, “tabata un dia cu den bista di cuerpo policial tabata mas cu claro cu no tin ningun clase di respet, ni pa reglanan di Covid, ni pa medidanan cu a wordo stipula”.

Kock a declara cu di parti di Crisis Team nan ta purba di tene na cuenta e diferente sector, pero di parti di cuerpo policial, nan a ripara cu no ta existi respet. Y loke nan ta confronta cune ta cu ta cuestiona un biaha mas e actuacion di polis pa loke ta trata samenscholingsverbod (prohibicion riba aglomeracion).

“E ta increibel con te ainda nos ta haya e pregunta di hende di pakico no mag di para den grupo, como si nan no ta consciente di kico ta pasando”, Kock a comenta.

Tambe nan ta confrontando cu doñonan di establecimento, sabiendo cu nan mester a keda cera 18 di maart ultimo, pero nan a tuma e decision di habri toch, pa motibo cu nan a haya necesario habri nan luga. Ademas Kock a sigura cu tabatin mayornan cu a cana cu nan yiunan chikito na establecimentonan nocturno, sin ta consciente di e situacion actual.

Pa loke ta trata e cambio di medidanan cu lo ta vigente for di mañan, diasabra 20 di maart, Kock a expresa cu samenscholingverbod ta bira dos persona. Si personanan ta cuestiona di pakico no por ta para den grupo, Kock a bisa cu si den momento e personanan no ta cumpli cu esaki nan lo wordo deteni.

Gebiedsverbod ta keda igual, for di 7or di anochi te cu 5or di mainta. Y lo sigui cu accionnan riguroso na unda polis lo subi riba parkeerplats y lo sigui haci’e den bisindarionan tambe; el a specifica cu na districto di Oranjestad nan lo haci’e sigur y wak pa no tin aglomeracion.

Toque de queda lo keda cu e mesun orario te awor, segun Kock a manifesta, y esey ta depende di e actuacion di henter comunidad den dianan nos dilanti.

Actividadnan social no ta permiti y no ta bay duna permiso pa esaki tampoco. Kock a bisa cu aunke nan no ta duna e permiso, personanan ta tuma e decision riba nan mes di organisa nan actividadnan sin permiso.

Di situacion riba lama, el a informa cu e toque de queda tambe ta conta pa ta riba lama cu excepcion di piscadonan cu ta registra. No lo duna permiso pa haci actividadnan riba rif ni na rancho, pa motibo cu esey no lo wordo acepta.

Di entiero el a declara cu e awor lo permiti 10 persona solamente, evento social of bishita na cas no ta permiti, pa loke ta trata restaurantnan ta permiti 2 persona so den un mesa y barnan lo keda cera.