Diabierna proximo lo ta un dia importante pa nos pais. Lo tin reunion di Conseho di Ministro di Reino unda muy probablemente lo tin palabra final tocante e pregunta grandi: gobierno di Aruba ta bay di acuerdo cu e condicionnan cu Hulanda a pone pa continuacion di e ayudo di emergencia?

A pesar cu nos ta tende cu lo tin un claridad riba e pregunta aki promer cu diabierna, nos no ta conta cu esaki. Loke si ta importante ta cu den e diferente posicionnan cu no a tende o lesa den ultimo lunanan, por ripara cu tin un diferencia di opinion entre nos promer minsitro y parti di su partido, cu ta keda contra cualkier acuerdo cu Hulanda. Esaki por ehemplo a sali na cla den e carta cu na nomber di parlamento su presidente a manda pa premier Rutte. E posicion di gran parti di parlamento contra e acuerdo no ta algo sin importancia, pasobra finalmente ta parlamento mester aproba loke gobierno ta haci. Den e caso concreto aki anto ta gobierno mester duna Den Haag un contesta pa diabierna, pero por haya su mes confronta cu un parlamento cu den su mayoria ta desaproba loke gobierno ta palabra. Manera e asunto ta mustra awor, cualkier convenio cu Hulanda por conta cu un reaccion negativo for di parlamento. Ban explora un poco kico por sucede.

Den caso cu promer ministro mantene su palabra cu e “no ta permiti Aruba kibra”, cu claro referencia na e situacion cu lo surgi si nenga e ayudo Hulandes, mientras no tin otro alternativa, e bala ta riba cancha di parlamento. Pero e pregunta grandi ta si e partidonan di e coalicion lo vota pa baha nan propio gobierno, y esaki pa un motibo masha simple. Si un eventual acuerdo cu Hulanda lo tin como consecuencia cu parlamento ta manda gobierno so cas, cu esey nan lo ta mandando nan mes cas tambe, pasobra promer ministro lo disolve Staten y yama eleccion nobo. Esey lo trece un ‘ball game’ completamente nobo, unda tur partido tin di perde den e situacion ey. E partidonan di coalicion lo perde pasobra laga e grupo grandi di hende, entre nan hopi di nan propio votadornan, sin pan riba mesa ta algo cu hende no ta bay lubida asina liher. Tin problema special pa e partidonan chikito tambe, especialmente POR, cu a perde hopi prestigio a traves di e conflicto interno cu a termina siman pasa den Staten cu un flop grandi cu no a sirbi nan di nada. Un eleccion promer cu fin di aña por bien significa un desaparicion di e partidonan chikito, tumando na cuenta cu pueblo lo tuma nan na malo tambe cu cos a yega asina leu cu aparentemente pa nan ta mas importante contempla interes politico di un grupo cu sigui interes di pueblo cu actualmente ta un cos: pan riba mesa!

Pa e partidonan grandi tampoco eleccion tempran lo ta conviniente. Pa e partido den gobierno actualmente lo ta dificil pa mantene nan base ya cu bon parti di esnan den necesidad ta nan votadornan tambe. Pa e partido opositor tampoco e situacion di eleccion tempran lo ta faborable, pero esun di otro aña tampoco, mirando e desprestigio cu e presencia di dos ministro cu potencialmente lo mester bay cera pa basta aña si e acusacionnan resulta berdad y proba. Hunto cu esun ya condena den promer instancia ta trata di tres cu a haya nan training den e partido berde. Ademas, na e momento aki e partido opositor tampoco ta apoya un acuerdo cu Hulanda, cu resultado cu, si e situacion aki mester surgi, por bisa cu gran parti di e mundo politico local no a sirbi pueblo di nada na e momento cu realmente ta conta. Segun nos opinion, e unico caminda viable ta acepta e condicionnan y traha cu Hulanda pa drecha e tantisimo cosnan cu no ta anda bon den e lugar aki.

Ademas tin un otro aspecto cu nos politiconan mester tuma na cuenta, y esey ta con nan tin pensa di maneha e situacion cu lo surgi si un eventual rechaso di e proposicion Hulandes hiba na un situacion di caos economico y desempleo. Nan tin e instrumentonan pa coregi esey? Segun nos, no, y nan sa esey masha bon. Ta pesey cu nos por imagina nos un situacion unda gobierno ta acepta e acuerdo cu Hulanda, y den parlamento… nada ta bay pasa. Claro cu nan ta bay zundra, rabia, tene discursonan flamante un tras di otro, pero baha nan propio gobierno y parti e partido grandi den gobierno na dos, nos no ta mira esey ta bay sucede. Nan tin un demasiado bon nocion di nan propio interes pa bay comete suicidio politico y duna oportunidad na otronan pa ocupa e espacio politico cu nan ta laga atras.

Di e manera aki nos por imagina e posibilidad cu gobierno ta cera acuerdo cu Hulanda, y pa vista di hende ta ‘call the bluff’ di nan coleganan den parlamento, cu na varios ocasion caba a proba cu no ta nan ta manda den nan respectivo partido. Niun hende ta bay tumba gobierno e proximo dia y simannan aki. Esey e debate di mocion di desconfianza a siña nos siman pasa: paper tigers.