E sindicalista Diego de Cuba a bisa enfaticamente cu aworaki cu STA gana e referendum di e trahadonan di waf, nan tin e derecho pa exigi na gerencia di ASTEC, tur informacion y documento, entre otro di e fondo di pensioen di e trahadonan. Te hasta el a bay mas leu di menasa cu un accion otro siman, den caso cu ASTEC ta pone motibo pa bin cu e accion aki.
“Si nan ta pone motibo pa nos bay den accion, nos ta bay den accion tambe! Y e biaha aki cu nos ta bay den accion no kere cu niun hende ta bin kibra e accion, pasobra ta bay bin confrontacion”, el a bisa. E sindicalista a declara cu esaki ta un advertencia cu STA ta haci for di aworaki caba ya cu nan no ta bay haci wega.
E anuncio aki ta bin despues cu a keda conoci e resultado di e referendum cu a tuma luga diahuebs ultimo den e sede di Mediador di Gobierno, cu participacion di sindicato UPA (Union Portuario Arubano). Sr. de Cuba no a basila pa bisa cu si ASTEC ta nenga nan e documentonan cu STA pidi; nan ta hiba ASTEC dilanti di corte.
STA ta bay pidi den un carta cu nan abogado lo manda pa gerencia di e compania, tur documentonan y informacion. E sindicalista de Cuba a laga sa cu ASTEC lo haya te diamars awor pa entrega e documentonan cu nan ta exigi. Si nan no entreganan pa diaranson, STA lo bin cu un caso sumario den corte. “Nos no ta bay haci wega cu nan aworaki, pasobra e cos aki a caba. Aworaki cu STA a drenta ta pa pone e cosnan aki straight”, el a bisa.
Segun e sindicalista, tin hopi cos cu nan mester busca contesta riba nan. P’esey nan lo manda un carta na gerencia di e compania pa solicita un reunion urgente cu nan. Sr. De Cuba a anuncia cu nan abogado a manda carta pa e compania pidiendo un serie di documentonan pa locual ta trata e fondo di pensioen di nan trahadonan y te ainda e sindicato no a ricibi nada. Aworaki cu STA a gana e referendum “a nos tin e derecho pa nos bay exigi esaki!”, el a bisa
“E trahadonan a bisa ta basta y nan conoce STA. Ora nos drenta, nos no ta haci wega. Nos kier sa precisamente kico ta pasando.”
Fondo di pensioen y CAO
Un punto cu STA kier haya mas informacion tin di haber cu e fondo di pensioen di e trahadonan. Nan kier sa ken ta maneha e fondo y con e ta wordo maneha. El a haci mencion cu un tempo atras a presenta un caso cu un placa a disparce di alrededor di 1 miyon florin y tur cos a keda manera keto. “Kico a pasa? E placa a bin bek na e fondo di pensioen? Unda e placa ta wordo inverti? E fondo di pensioen ta generando placa extra?”, ta preguntanan cu e sindicalista tin.
Tambe STA kier keda cla lo mas pronto posibel cu un contracto colectivo (CAO). Segun de Cuba e trahadonan di ASTEC ta kedando atras pa basta tempo caba y STA como sindicato nobo di e mayoria di e trahadonan di waf, kier wak un mehoracion di nan CAO, tanto den beneficio primario como secundario.
Contrario na declaracionnan di UPA, e no ta kere cu e trahadonan di ASTEC tin un di e miho CAO na Aruba. Sr. de Cuba a laga sa cu e mes a pasa door di e CAO y ora e ta compar’e cu e CAO cu nan tin na AAA (Aeropuerto) y APA, e ta kere cu tin espacio pa “mehoracion bastante formal”.
Ademas e trahadonan di waf tin otro tipo di problemanan cu STA ta bay atende cu gerencia di ASTEC, entre nan problema di stof y gas den e waf di Barcadera cu ta resulta dañino pa nan. Segun Sr. de Cuba hopi cos nobo mester bin den e CAO cu nan ta bay negosha cu ASTEC. “Tin hopi espacio di mehoracion den e CAO. Pasobra mi ta bisa cu si nan ta inverti den e waf, bo por inverti den bo trahadonan tambe”. Sr. de Cuba ta argumenta cu precisamente ta e trahadonan ta esunnan cu ta pone e waf draai.
