Parlamento kier traha riba un ley pa sigura cu e data di tur persona na Aruba ta wordo salvaguardia debidamente. Pero tambe e derecho di e persona di sa kico ta pasa cu nan data.

Parlamentario Daphne Lejuez (MEP) ta esun tras di e ley nobo of cambio di ley, specialmente awor cu Union Europeo proximamente lo pone un ley asina na vigor. Tin un ley na Aruba cu ta protege e tipo di informacion personal aki, pero e no ta actualisa ainda. E ta kere cu esaki ta cay bou competencia directo di parlamento di Aruba, mirando cu esaki lo mester wordo implementa como ley y como tal e ta bin bek parlamento. “Akinan nos tin un ley, pero e ley no ta suficiente. O sea nos ta bay amplia of nos ta bay reemplasa e ley cu algo nobo cu si ta cumpli cu e rekisitonan.”

Aplicacion na Aruba
Segun e parlamentario e ley proteccion aki ta duna e control bek na e ciudadano kico ta pasa cu su informacion. Bon Dia Aruba a papia cu e legislado riba e proteccion di data personal con esaki ta aplica den nos caso como ciudadano di reino Hulandes. E ta investigando con leu esaki lo aplica na nos hendenan. Defacto nos paspoort mes no ta bisa Aruba, sino Hulanda y e tin e seyo di Union Europeo riba dje. E ta deduci logicamente cu nos lo cay riba e ley aki. Pero e ta kere cu si Aruba no ta participa pa adapta e ley aki nos lo por cay den exclusion.

Pasobra obviamente nan ta bay trata cu e paisnan y instancianan cu nan sa cu nan informacion of datonan personal ta protegi.

Parlamentario Lejuez ta referi cu mester institui un tipo di instancia cu lo tin e tarea specifico di brinda e siguridad aki. Ya cu e ta haya cu e introduccion di e tipo di siguridad aki lo trece beneficio pa pais Aruba. Muy specialmente cu Aruba ta un isla turistico continuamente tur nos bishitante lo sinti protegi si nan sa cu nan informacion ya sea den hotel, restaurant, car rental, etc… unda nan ta laga nan informacion via pa ehempel credit card, e ta wordo protegi. E lo yuda nos te hasta pa loke ta e parti turistico ora cu nos ta bay expande den tereno digital creando industrianan nobo.

‘Nos ta laat’
E ta kere cu e propuesta di ley Europeo di 2016 tabatin hustamente esey den mente. E ley aki ta bay den vigor dia 25 di mei awor. Tur e paisnan den Union Europeo ya caba nan ta asina leu di implementa e ley aki. Tur e companianan grandi entre na Google cu ta trata cu datanan di ciudadano Europeo ya caba a haci e tipo di adaptacion aki. “Nos ta laat!, ” e di. Sinembargo si nos ta mustra nos bon boluntad cu Aruba ta trahando pa haci e cambionan necesario ya caba e lo yuda nos. Pa motibo cu Aruba no ta cay directamente bou Union Europeo, pero nos ta trata si cu datanan di ciudadano Europeo.

Europa a habri frontera y bo por move libremente entre tur pais Europeo. Esaki kiermen cu tur bo documento personal entre nan bo paspoort y credit card caminda bo ta uza nan, bo ta laga lastro di bo identidad atras. No tur pais ta riba e mesun linea con pa anda cu data personal. “Pa evita cu fraude of cu nan por horta bo informacion of cualkier cos, loke Union Europeo kier pa tur ta standarisa…”

Segun e parlamentario e tipo di ley aki ta bay mas leu cu e paisnan Europeo, ya cu e ta trata di proteccion di data di ciudadano Europeo. Unda cu nan ta bay rond mundo y esey kiermen cu tur pais, instancia of gobierno cu ta trata cu informacion di ciudadano Europeo mester tene esaki na consideracion con nan ta bay trata cu e informacion aki. Den e caso aki como ciudadano Europeo-Hulandes bo por exigi pa nan bisa bo kico nan ta bay haci cu mi data. “Nan no por uz’e pa haci mercadeo cu ne.” Nan no mag pa ehempel di rebende e datanan personal aki cu un agencia di publicidad of marketing.

E scandal cu a tuma luga recientemente relaciona cu Facebook y e leakmento di informacion pa traha e profiel di potencial votado durante e campaña di e actual presidente di Merca. Ta e caso cu a sosode den Facebook unda bo ta duna cierto informacion pero niun momento bo a bay di acuerdo cu esaki pa nan facilita pa un partido politico por a haci uzo di dje.